80 жастағы қазақстандық Салтанат Түйтебаев әлемдегі ең қиын марафондардың бірі саналатын Нью-Йорк марафонын бағындырып, 80-89 жас санаты бойынша жеңіске жетті. 2025 жылдың 2 қарашасында ол әйгілі Веразано көпірінен бастап, бес көпірді еңсеріп, үлкен сыннан сүрінбей өтті.
Әлем спортшылары "бейресми әлем чемпионаты" деп атайтын Нью-Йорк марафоны күрделі бағытымен ерекшеленеді. Жарыс жолының алғашқы шақырымы Стейтен-Айленд пен Бруклинді жалғайтын Веразано (Verrazzano-Narrows Bridge) көпірінен басталады. Ұзындығы шамамен 4 шақырым болатын бұл көпір теңіз деңгейінен 69,5 метр биіктікте орналасқан. Сондықтан ол жүгірушілерге қосымша қиындық тудырады.
Салтанат Түйтебаев жасына және күрделі бағытқа қарамастан 4 сағат 45 минут 56 секунд нәтижесін көрсетті.
Бұған дейін ол Астанада осындай қашықтықты 4 сағат 25 минутта жүгіріп өткен еді. Алайда Нью-Йорк тас жолдары әлдеқайда қиын болды. Себебі бес көпірдің әрқайсысы айтарлықтай күш пен төзімділікті талап етті.
