Ахмади Маханов биыл керемет нәтижелер көрсетіп, рейтингте де, жарыстардағы жетістіктерімен де қуантты. 13 жастағы теннисші Ақтөбе теннис мектебінің тәрбиеленушісі. Tennis Europe рейтингісінде 14 жасқа дейінгі ойыншылар арасында Ахмади 62-орыннан 13-орынға дейін көтерілді.
Өткен жылы жас қазақстандық Tennis Europe аясындағы үш титул жеңіп алды. Оның екеуі жекелей сында болса, біреуі жұптық сында. 2025 жыл Ахмади үшін табысты басталды. Чехияның Бржецлав қаласында өткен екінші санаттағы турнирде жұптық сайыста жеңіске жетіп, жеке сында финалға дейін жетті. Алайда финалға қатысудан бас тартуға тура келді. Өйткені Францияда өтетін суперкатегориялы Les Petits As турниріне аттануы керек болды.
Les Petits As – бұл 1982 жылдан бері Францияның Тарб қаласында жыл сайын өтетін еуропалық турнир. Мамандардың пікірінше, ол Америкада өтетін Orange Bowl турнирінің еуропалық аналогы болып саналады және бейресми түрде 14 жасқа дейінгі жасөспірімдер арасындағы әлем чемпионаты ретінде мойындалған.
Бұл жарыс Еуропа мен әлемнің үздік жасөспірімдерінің басын қосатын жарыс. Сондықтан жеңімпаздар мен қатысушылар қатарында Майкл Чанг, Рафаэль Надаль, Энди Маррей, Ким Клийстерс, Линдсей Дэвенпорт, Мартина Хингис сынды танымал кәсіби спортшылар көп.
Францияда Ахмади Маханов жекелей сында екінші айналымға дейін жетсе, жұптық сында жартылай финалға дейін жетіп, ерекше әсер қалдырды. Ширек финалда Ахмади венгриялық Венцель Фижесеспен жұптасып, Карлос Алькарастың інісі Хайме Алькарас пен гонконгтық Кайли Ванды 6:4, 6:4 есебімен жеңді.
Айта кетейік, бұл турнирде қазақстандық спортшылардан бұған дейін жартылай финалға дейін бір де бір теннисші жеткен емес.
Қазақстандық рейтингте Ахмади 14 жасқа дейінгі ойыншылар арасында бірінші орында тұр. Қазіргі уақытта қазақстандық теннис жұлдызы Астанадағы Team Kazakhstan академиясында жаттығуда.
