/img/tv1.svg
RU KZ
Ақпараттық хабарлама

Ақпараттық хабарлама

MEDIA HOLDING «ATAMEKEN BUSINESS» ЖШС-ның ҚР Президенттігіне үміткерлер үшін жалпы шарттары мен эфир уақытының көлемі.

13:10 20 Мамыр 2019 1750

Ақпараттық хабарлама

Автор:

MEDIA HOLDING «ATAMEKEN BUSINESS» ЖШС-ның 2019 жылы 9 маусымда өтетін Қазақстан Республикасы Президентінің кезектен тыс сайлауына қатысушы ҚР Президенттігіне үміткерлер үшін «АТАМЕКЕН BUSINESS» іскерлік телернасы мен inbusiness сайтында эфир уақытын ұсынудың жалпы шарты, тәртібі және көлемі.

MEDIA HOLDING «ATAMEKEN BUSINESS» ЖШС (бұдан әрі – БАҚ иесі) Қазақстан Республикасы Президенттігіне тіркелген үміткерлерге (бұдан әрі – үміткер) сайлау алды үгіт аудио және аудиовизуалды материалдарды (бұдан әрі – үгіт материалдары) №1,2 қосымшада көрсетілген баға-тізіміне сәйкес орналастыруға ATAMEKEN BUSINESS іскерлік телеарнасы мен inbusiness.kz сайтында эфир уақытын ұсынады.

ATAMEKEN BUSINESS іскерлік телеарнасында бір үгіт материалының хронометражы 30 (отыз) секундтан аспау керек.

Эфир уақытын ұсыну үміткермен немесе бір тараптан үміткердің уәкілетті өкілімен және БАҚ иесімен немесе басқа тараптан БАҚ-тың уәкілетті иесі атынан жасалған эфир уақытын ұсыну туралы жазбаша келісімшарт және  осыған сәйкес бекітілген монтаждау парағы негізінде іске асады. Бұл ретте монтаждау парағы эфирге шығады деген күннен 3 (үш) күн бұрын әзірленеді.

Эфир уақытын ұсыну туралы келісімшарт жасауға үміткердің немесе оның уәкілетті өкілінің БАҚ иесі басшысының атына жазған жазбаша өтініші негіз болады.

Саны, кесте, хронометраж, үгіт материалдарын эфирге хабарлау уақыты, сондай-ақ жарнамалық блоктағы орын үміткердің немесе оның уәкілетті өкілінің жазбаша өтінішінде көрсетіліп, содан кейін келісімшартта жазылады.

Жазбаша өтінішке келесі құжаттар қоса тіркеліп берілу керек:

1) үміткердің тіркелгенін растайтын құжаттың көшірмесі;  

2) үміткердің уәкілетті өкілі екенін растайтын құжаттың көшірмесі; 

3) үгіт материалының жазбаша мәтіні; 

4) өтініш берушінің жеке куәлігінің көшірмесі; 

5) келісімшарт жасауға келген адамның өкілеттігін растайтын құжат;

Жарнамалық блокқа үгіт материалдарын орналастыру тәртібі жазбаша өтініштердің келіп түсу тәртібіне қарай немесе БАҚ иесі белгілеген тәртіптегі жеребе бойынша анықталады. Егер өтініш түскен кезде сұратылған уақыт (жарнамалық блоктағы орын) ерте өтініш берген басқа үміткерге берілген болса, онда БАҚ иесі өтініш келіп түскен уақыттан бастап жиырма төрт сағат ішінде үміткерге басқа сан, кесте және уақытты анықтау үшін хабарлама жібереді. Бұл ретте үміткердің өтініш берген уақыты деп қайта өтініш (өзгертілген)  берген уақыты саналады.

Үгіт аудиовизуалды материалдар келесі талаптарға сай болу керек:

а) контейнер: mov;

б) кодек: Quicktime;

в) видео ағыны: 8000 kbit/sec кем емес;

г) форматы: mov;

д) кадрдың көлемі: 1920х1080 пиксель;

е) кадр форматы: 16х9;

ж) кадрдың жиілігі: бір секундта 25 кадр;

з) дыбыс: stereo, mono, 48Khz, 16bits.

Бұлар HDD және Flash-card цифрлық тасымалдаушыларда ұсыналады және HD 1080i50 форматта, MOV немесе MP4 контейнерде, битрейті 10 Mbit/s-тен төмен емес, эмбедирлі дыбысы-12dB болуға, сонымен қатар эфирге шығатын күннен 3 (үш) күн бұрын берілуге тиіс. Цифрлық тасымалдаушымен бірге эфир уақытын ұсыну туралы келісімшартқа қол қоюға уәкілетті өкіл қол қойған үгіт материалының мазмұны болып табылатын жазбаша мәтін және үгіт материалында бейнесі пайдаланылған адамдардан жазбаша рұқсат, егер олар қайтыс болған болса, олардың мұрагерлерінен жазбаша рұқсат ұсынылу керек.

Барлық үгіт материалында олардың төленгені туралы ақпарат, қаржыландыру көзі, ақпаратты ұсынушы адамның тегі болуға тиіс.

БАҚ иесі үміткер жүз пайыз алдын-ала төлем жасағанда ғана үміткер алдындағы өз міндетін орындайды.

Үгіт материалын ұсынушы үміткеркерлер олардың мазмұны Қазақстан Республикасы заңнамасы талабына, оның ішінде авторлық және сабақтас құқықтарға сай келуі үшін жауапты болады

Осы хабарламада көрсетілген шарттар мен тәртіп бұзылған жағдайда, сондай-ақ тиісті келісімшарттың талабын бұзған жағдайда үгіт материалдары эфирге шығарылмайды немесе бұзылу жойылғанға дейін тоқтатылады.

Егер үгіт материалының мазмұны конституциялық құрылысты күштеп өзгерту, республиканың тұтастығын бұзу, мемлекеттің қауіпсіздігін бұзу, әлеуметтік, нәсілдік, ұлттық, діни, тектік-топтық және рулық араздықты, қатыгездік пен зорлық-зомбылықты құрметтеу туралы идеяларды қамтитын болса, сонымен қатар заңда қарастырылмаған әскери топтарды құруды көздейтін болса, онда  БАҚ иесі үгіт материалдарын таратудан бас тартады.  

БАҚ иесі үгіт материалдарында Қазақстан Республикасы Президенттігіне басқа үміткерлердің ар-намысына, қадір-қасиетіне немесе іскерлік беделіне нұқсан келтіруі мүмкін ақпарат болған жағдайда үгіт материалдарын таратудан бас тартуға құқылы.

Осы ақпараттық хабарламада көрсетілген эфир уақытын берудің шарттары мен тәртібі Қазақстан Республикасының уәкілетті органдарының талаптарына сәйкес түзетілуі мүмкін.

Жазбаша өтініштер 2019 жылдың 6 мамырынан бастап сенбі мен жексенбіден басқа жұмыс күндері сағат 10.00-ден 17.00-ге дейін, Нұр-Сұлтан қаласы, Қабанбай батыр даңғылы 17 мекенжайы бойынша ATAMEKEN BUSINESS іскерлік телеарнасында қабылданады. Үзіліс 13.00-ден 14.00-ге дейін.

«Айлығын азайтса, ұйқышыл депутаттар өздері-ақ кетеді»

10 Ақпан 2020 16:17 4665

Депутаттықтан үміткер жастардың 30%-дық квотасына әйелдер ортақтасады. 

Әділет министрлігінде депутаттықтан үміткер жастарға квота бөлу мәселесі тағы талқыға түсті. Бұл жолы қоғамдық кеңес мүшелері партиялық сайлау тізіміндегі 30%-дық квотаны әйелдермен бөлісетін жастардың нақты жасы қаншадан аспауы керек деген сауалдың төңірегінде бір байламға келе алмай тарқасты.

Білім және инновация палатасының төрағасы Мұрат Әбенов бастаған бір топ сайлауға партиялық тізім арқылы түсетін жастардың жасы 29-дан аспауы керек деген заң талабына қарсы шықты. Бір қызығы, бұл ұстанымды Zhas Otan жастар қанатының төрағасы Елнұр Бейсембаев та қолдап шықты.

«Заң жобасында жергілікті мәслихат пен Парламентке бірдей жас белгілеп қойған, 25 пен 29 аралығы. Бұрын 29 деген жастар санатының шегі болатын. Ал қазір оқуды 27-ге келіп аяқтайтындар бар. Отбасын құру жасы да бұрынғыдан 4 жылға кейіндеп кетті. Тәжірибе жинап үлгермеген адамды заң шығару сияқты маңызды іске араластырғалы отырмыз. Менің ойымша, жастар квотасына 35 жасқа дейінгілерді енгізген дұрыс шығар. Ал мәслихатқа 29 жас қала берсін. Бірақ 25-тен басталуы керек деген талап сақталғаны дұрыс. Алашорданың барлық басшылары 28-29-да болған екен ғой», – деді Мұрат Әбенов.

Сенаторлықтың дәмін татып үлгерген тағы бір экс-депутат, Әділет министрлігінің қоғамдық кеңес төрағасы Серік Ақылбай да «кемел жас» концепциясын жанын сала қолдады. Ол тіпті Президент Қасым-Жомарт Тоқаевтың тапсырмасымен қолға алынған заң жобасын «Парламентті балабақшаға айналдыру» деп бағалады.

«Бұрынғы сенатор, судья ретінде бұл ұсынысты қолдаймын. Мысалы, қазір судьялар 35 жастан бастап тағайындалады. Неге 29 жаспен шектеліп отырғанымыз түсініксіз. Депутат деген өмірлік тәжірибе жинақтаған, кемел жастағы адам болуы керек. 29 жастағы ұл халықпен қалай кездеседі? Мен депутат болып жүргенде жасым 60-та еді. Соның өзінде халықтың сауалына жауап беруге қиналатынмын. 29 жасында адам өмірді танып үлгермейді. Оның үстіне 29 деген шегі болып тұр. Заң шығарушы органды балабақшаға айналдырудың қажеті жоқ. Заң шығару деген жай келіп, отырып, сықылықтап кету емес. Маңызды мәселелер шешілетіндіктен, маңызды адамдар отыруы керек», – деді экс-сенатор.

Абырой болғанда министрлік жанынан құрылған қоғамдық кеңес мүшелерінің арасында депутаттар құрамын жасарту бастамасына оң қабақпен қарайтын жандар да бар екен.

«Келісу» кәсіпқой медиаторлар одағының директоры Сара Ыдрысова «кемел жастағы» депутаттардың ұйқысы да кемел екенін бүкіл халық көргенін еске салды.

«Мен депутаттар кемел жаста болуы керек дегенмен келіспеймін. Парламентте істедіңіз, білесіз. Сол кемел жастағы депутаттардың ұйықтап отырған сәттері интернетте толып жүр. Сіз айтқан маңызды мәселелерді олар ұйықтап отырып шешеді.  Сондықтан  депутаттар құрамын жасарту керек деп санаймын. Сирек жағдайда болмаса, 60 пен 70-тен асқан жолдастарды Парламентке жібермеу керек. Олар – өмірден шаршаған адамдар. Тәжірибесі тасып бара жатса, басқа іске арнасын. Егер Парламенттің тиімділігін арттырғыларыңыз келсе, депутаттың айлығын азайтып, барлық жеңілдікті алып тастаңыздар. Сонда ғана ел игілігі үшін шын ниетімен жұмыс істейтіндер іріктеледі», – деді ол.

Жиын барысында депутаттықтан үміткер орта буын өкілдері аға буын кандидаттармен бәсекелескеннен гөрі жастар мен әйелдерге бөлінетін квотаға ортақтасуды оңай көретіні байқалды. Аға буын да қалған 70% мандатқа орта жастағы үміткерлерді ортақтастырғысы келмейтін сияқты.

«Zhas Otan жастар қанатына 29-ға дейінгілер қабылданады. Расымен де біздегі жастардың белсенділігі айрықша. Біз квотаға ілінетіндердің жасын 35-ке дейін көтеру арқылы олардың құқығын шектеп жатқан жоқпыз. Керісінше, қатарын толықтыратын едік. Мысалы, менің жасым 31-де дейік. Қазіргі талап бойынша мен партиялық тізімнің квотасынан тыс қаламын. Яғни, маған жасы үлкен, беделді азаматтармен бәсекеге түсуге тура келеді. Екеуміз қатар сайлауға түссек, жасы үлкен үміткердің даусы көп болатыны анық», – дейді Елнұр Бейсембаев.

Жиын барысында заң жобасының өзге де шикі тұстары ашылды. Парламенттік сайлауға түсетін партиялар үміткерлердің тізімін 30%-дық квота талабын сақтай отырып өткізуге тиіс.

«Санмен сөйлесек, Мәжіліске партиялық тізім бойынша 98 адам өтеді. Конституциялық заң бойынша бұған қосымша 30 орын тағы бар.  Сонда 98 мандатқа әр партия 128 адам ұсынады деген сөз.  Сонда 30% дегеніміз 35 адам деген сөз. Осынша әйел мен жастар болуы керек», – дейді Әділет министрлігінің Заңнама департаментінің директоры Олжас Данабеков.

Дегенмен, ол бұл талаптың іс жүзінде орындалмай қалуы мүмкін екенін жоғға шығармады.

«Теориялық тұрғыда саяси партиялар сайлауға дейін тізімді талапқа сай өткізіп, сайлаудан кейін мандаттарды бөлісу кезінде ол талапты сақтамай қоюы мүмкін. Заң жобасында бұл мәселе реттелмеген», – деді министрлік өкілі.

Қоғамдық кеңес мүшелері әйелдер қос палатағы 30%-дық межені қазірдің өзінде толтырып отырғанын айтады. Заң жобасында олардың пайыздық ара-жігі нақты көрсетілмеген. Сондықтан, қазіргі  құрам сақталған жағдайда жастарға заң шығару органынан орын бұйыруы екіталай көрінеді.

Есімжан Нақтыбайұлы        

 

 

Квотамен сайланған әйел депутатқа әйелдер ісімен айналысу міндет

05 Ақпан 2020 10:57 1923

Сайлау және саяси партиялар туралы жаңа заң тұжырымдамалары жарияланды. 

Әділет министрлігінің түсіндіруінше, «Саяси партиялар туралы» заңға өзгерістер мен толықтырулар енгізу туралы» жаңа заң жобасы небары 2 баптан ғана тұрады.

Оның біріне сәйкес, бұдан былай жаңа партия ашу үшін құрылтайшыға 20 мың мүше жиса, жеткілікті болмақ.

«2019 жылғы 20 желтоқсанда Ұлттық қоғамдық сенім кеңесінің екінші отырысында Мемлекет басшысы саяси партияларды құру үшін тіркеу кедергісін 40 мыңнан 20 мың адамға дейін төмендетуді тапсырды. Бұл тапсырманы «Саяси партиялар туралы» заңға түзету арқылы іске асыру ұсынылады», – деп түсіндіреді ведомство.

Сонымен қатар Әділет министрлігі «Қазақстандағы сайлау туралы» конституциялық заңына толықтырулар енгізу туралы» жаңа конституциялық заңы жобасының тұжырымдамасын да ұсынды.

Құжат Қасым-Жомарт Тоқаевтың сайлауға түскен саяси партиялардың Орталық сайлау комиссиясына ұсынатын партиялық тізімінде әйелдер мен жастарға арналған міндетті 30% квотаны қарастыру туралы тапсырмасын орындауға бағытталған.

«Ұлттық заңнамада бұл міндетті іске асыру үшін берік құқықтық негіз құру қажет.Алайда қазіргі уақытта тиісті заңның болмауына байланысты сайлау тізіміне енгізілген адамдардың жалпы санынан әйелдер мен жастарға ұсынылған 30%-дық квотаның сақталуын қамтамасыз етудің қандай да бір нақты тетіктер жоқ. Сондықтан партиялық тізімдерде әйелдер мен жастар үшін 30% квота енгізу заңнамалық тұрғыдан бекітіледі», – деп түсіндіреді ведомство.

Айтқандай, осы квотамен сайланған жастар мен әйелдер «тиісті әлеуметтік топтармен белсенді жұмыс істеуге және өз қызметінде олардың мүдделерін ескеруге міндеттеледі». Әйтпесе, нәзік болмыс иелері және жас ұрпақ өкілдері көлігі судан өткесін, яғни Парламент орынтағына жамбасы тигесін өз тектестері мен құрбы-құрдастарын ұмытып кетеді, олардың мәселесімен айналыспайды.

Аты айтып тұрғандай, бұл квотаға іліккісі келетіндер не әйел болуы не жасы 29-ға толмауы шарт. Әділет министрлігі квотаға кіргісі келетіндер жасын осылай шектеуді, ал жастар мемлекеттік бағдарламасында бекітілген 35 жас межені алмауды жөн көрді.

Құжатқа сәйкес, егер қандай да бір партияның Ортсайлаукомға өткізген тізімінде жастар мен әйел кандидаттар үлесі 30 пайыздан кем болып шықса, бұл тізімді қабылдаудан бас тартуға себеп болуы мүмкін.

«Қазақстандағы сайлау туралы» конституциялық заңда партиялық тізімді тіркеуден бас тарту негіздерінің бірі ретінде саяси партияның тізімді ұсыну ережелерін бұзуы бекітілген. Осыған байланысты «Саяси партиялар туралы» заңда саяси партиялардың өз тізімдерінде аталған квотаны қамтамасыз ету міндетін белгілейтін нормаларды бекіту ұсынылады. Қазақстанның сайлау жүйесінде және сайлаудың өзінде гендерлік әрі жас бойынша квотаның белгіленуі ел Конституциясына қайшы келмейді», – делінген тұжырымдамада.

Сарапшылар билік бұған сайлау процесіне жаңа сайлаушыларды тарту үшін барып отырғанын айтады. Себебі әр сайлау өткен сайын оған дауыс берушілерді тарту қиын болып барады.

Ұлттық қоғамдық сенім кеңесінің сайлау және партиялар туралы заңнаманы өзгертуге жауапты мүшесі, «Транспаренси Қазақстан» өкілі Марат Шибұтов өзге партияларды оянуға шақырады. Өйткені Nur Otan партиясының жетекшісі Бауыржан Байбек аймақтарда праймеризге кірісетіндерін жариялап та қойды.

«Праймериз – Еуроодақта еуропарламентке ұмтылған барлық партия үшін басты тетік. Осы арқылы кадрлық құрам жақсартылады. Ал бізде басқа партиялар үнсіз. Nur Otan сайлауға дайындығының алғашқы сырларын сыртқа шығарды. Яғни, жергілікті жерлердегі барлық перспективті кадрларды партиялық тізімге ілгерілетуге тырыспақ. Заңдағы жастар мен әйелдерге квота бекітілуін қолдаймын, бұл – жақсы әлеуметтік лифт. Өңірлік элитаға бұл жағуға тиіс: орталықта ақсақалдар қашанғы отыра береді, ротация керек. Ал басқа партияларға енді осы жас пен жыныстағы келешегінен үміт күттіретін адамдарды өз тізіміне тарту қиын болады – олар қазірден кешігуде», – деген ойда Марат Шибұтов.

Жанат Ардақ