"Ақтөбе" Қазақстан Премьер-лигасының бесінші туры аясында "Қызыл-Жармен" кездесті. Матч Петропавлдағы "Қарасай" стадионында өтіп, 1:2 есебімен "Ақтөбе" жеңіске жетті.
Ойынның 66-минутында "Қызыл-Жар" клубының қорғаушысы Валерий Каршакевич есеп ашты. 90-минутта қосалқы құрамнан шыққан Дидар Жалмұқан таразы басын теңестірді. Ал 94-минутта Рифат Нұрмұғамет өз командасына жеңіс сыйлады. Бір қызығы, Рифат соңғы үш матч бойы алаңға қосалқы құрамнан шығып гол соғып келеді. Үш ұпайы қайтарып берілген "Ақтөбе" 9 ұпаймен екінші орынға көтерілді. Ал "Қызыл-Жар" алтыншы орында қала берді (7 ұпай).
Сондай-ақ қарағандылық "Шахтер" Премьер-лиганың бесінші туры аясында "Ақжайықпен" кездесті. Матч Нұр-Сұлтан қаласындағы "Астана Аренада" өтіп, 1:2 есебімен оралдық клубтың пайдасына шешілді. Бүгінгі матчқа "Шахтер" командасын Андрей Финонченко бас бапкер ретінде бастап келді.
Ойындағы алғашқы голды 39-минутта "Ақжайық" командасының қорғаушысы Евгений Козлов соқты. Араға бес минут салып Айдос Тәттібаев есепті теңестірді. Ал 73-минутта "Шахтер" клубының жаңа ойыншысы Дэвид Атанаскоски өз қақпасына гол соғып алды. Бірде-бір ұпайы жоқ қарағандылық клуб турнирлік кестенің соңғы сатысында тұр. Ал алтыншы ұпайына қол жеткізген оралдық команда сегізінші орынға көтерілді.
Ермұхамед Мәулен
