Александр Бублик Аустрияда өтіп жатқан ATP 250 турнирінің жартылай финалына шықты. Ширек финалда Бублик (ATP №30) Қазақстан құрамасының тағы бір өкілі Александр Шевченконы (ATP №110) 6:4, 6:2 есебімен жеңді.
Жүлде қоры 596 035 еуроға бағаланған доданың финалына шығу үшін Бублик әлемнің 103-ракеткасы, нидерландылық Ботик ван де Зандсхулпен кездеседі. Матч бүгін Қазақстан уақыты бойынша 17:30-да басталады.
Жартылай финалға шыққан Бублик 31 090 еуро сыйақы мен 100 рейтингтік ұпайды еншіледі. Дүйсенбі күні ол ATP рейтингінде кем дегенде 27-орынға көтеріледі. Қазіргі уақытта қазақстандық теннисші 6 матч қатарынан жеңіске жетті. Ал, соңғы екі айдағы жалпы көрсеткіші 15 жеңіс және 2 жеңіліс.
Александр Шевченко да құр алақан емес. Ол Китцбюэль турнирінен 18 мың еуро сыйақы және 50 рейтингтік ұпаймен кетеді.
