А.Бублик үшінші айналымда дүниежүзілік рейтингте 104-орында тұрған аустралиялық Джеймс Даквортпен күш сынасты. Бірінші партияда есеп 2:1 болған мезетте аустралиялық теннисші брейк жасай білді – 3:1. Дегенмен іле-шала А.Бублик таразы басын теңестірді – 3:3. Сосын тағы бір брейк жасап, өз геймін де алды – 5:3. Сетке доп бергенде, қателескен жоқ – 6:4.
Екінші сетте Д.Дакворт брейкпен алға кетті – 3:0. Бұдан кейін қазақстандық теннисші қатарынан бес геймді алып, есепті 5:3-ке жеткізді. Сосын бірінші матчболын пайдалана білді – 6:4. Бәсеке 1 сағат 23 минутқа созылды. А.Бублик ширек финалға шығу үшін әлемнің 32-інші, осы доданың 22-ракеткасы Тейлор Фритцпен таласады. Ол үшінші айналымда ұлыбританиялық Кэмерон Норриді 6:4, 3:6, 6:1 есебімен тізе бүктірді.
Ал, Қазақстанның бірінші, әлемнің 23-ракеткасы Елена Рыбакина Майами WTA 1000 турнирінің төртінші айналымына шыға алмады.
Осы жарыстың 21-ракеткасы болып тіркелген Е.Рыбакина үшінші айналымда дүниежүзілік рейтингте 58-орында тұрған испаниялық Сара Соррибес-Тормомен кездесті. Соррибес-Тормо екінші айналымда әлемнің 14-ракеткасы, америкалық Дженифер Брэйдиді 3:6, 6:4, 6:1 есебімен ұтқан болатын.
Бірінші партияда ойын тізгінін қолына алған испаниялық теннисші айқын басымдылық көрсетті – 6:1. Екінші сетте де Соррибес-Тормо брейкпен алға кетті – 2:0. Дегенмен Рыбакина таразы басын теңестірді – 2:2. Сосын тағы бір брейк жасап, өз геймін де алып, есепті 5:3-ке жеткізді. Қарқынды үдеткен ол сетті брейкпен түйіндеді – 6:3. Үшінші, шешуші партияны қарсыластар брейк алмасумен бастады – 1:1. Содан кейін испаниялық теннисші алға шықты – 3:1. Тағы бір брейк – 4:1. Рыбакина брейк жасағанымен, өз геймін беріп қойды – 2:5. Испаниялық спортшы матчқа доп бергенде, өз мүмкіндігін жіберген жоқ – 6:2. Тартысты бәсеке 2 сағат 28 минутқа созылды.
Ермұхамед Мәулен
