Алайда қазақстандық боксшылар бұл турнирдегі жетістіктері үшін мемлекеттен сыйақы алмайды, деп жазады inbusiness.kz сайты 1bol.kz порталына сілтеме жасап.
Әлем чемпионатында ұлттық құраманың қоржынында 3 алтын, 1 күміс және 2 қола медаль бар.
Халықаралық бокс қауымдастығының (IBA) қолдауымен өткен бұл дода жүлде қоры жағынан рекордтық көрсеткішке жетіп, жалпы сыйақы көлемі 8,3 миллион долларды құрады.
IBA тарапынан алтын медаль иегерлеріне 300 мың доллар, күміс жүлдегерлерге 150 мың доллар, қола жүлдегерлерге 75 мың доллар төленді. Сонымен қатар, жартылай финалға шыққан боксшыларға 10 мың доллардан сыйақы берілді.
Ал Қазақстан заңнамасына сәйкес, әлем чемпиондарына мемлекет тарапынан 15 мың доллар, күміс жүлдегерлерге 7 мың доллар, қола жүлдегерлерге 5 мың доллар көлемінде сыйақы қарастырылған.
Дегенмен бұған дейін Қазақстан бокс федерациясының бас хатшысы Мерей Ақшалов соңғы заңнамалық өзгерістерге сәйкес, мемлекет тек Халықаралық Олимпиада комитеті (ХОК) ресми мойындаған федерациялар өткізетін турнирлерді ғана қаржыландыратынын айтқан болатын. Қазіргі таңда ХОК World Boxing ұйымын мойындайды, ал IBA ресми түрде танылмаған.
Осыған байланысты IBA ұйымдастырған әлем чемпионатында жүлде алған қазақстандық боксшыларға мемлекеттен қосымша сыйақы төленбейді.
IBA әлем чемпионатының жүлдегерлері атанған қазақстандық боксшылар:
Алтын медаль:
- Сәкен Бибосынов (54 келі);
- Оразбек Асылқұлов (57 келі);
- Абылайхан Жүсіпов (71 келі).
Күміс медаль:
Сабыржан Аққалықов (75 келі).
Қола медаль:
- Теміртас Жүсіпов (48 келі);
- Ертуған Зейнуллинов (63,5 келі).
