Даниил өзінің кәсіби мансабын қазақстандық веложоба аясында бастады. Ол тек жастар санаты бойынша кәсіби деңгейге жетіп қана қоймай, шабандоз ретінде жеті маусым бойы отандық велоспорттың жоғары деңгейіне лайықты өнер көрсететін жарқын мысалы бола білді.
Қазақстан құрамасымен бірге жасөспірімдер және андер санаты бойынша бірқатар жетістіктерге жеткеннен кейін Даниил Ұлттық веложобаға құрлықтық "Астана Про Тим" командасымен бірге келді. Ол өзінің алғашқы үлкен жетістіктеріне дәл осы команда сапында жүріп қол жеткізді. Азия чемпионатында жеңіске жетті. "Цинхай көлі турының" жеңіс тұғырына көтеріліп, 23 жасқа дейінгі Әлем чемпионатында жекелей өнер көрсету бойынша 9-нәтиже көрсетті.
Даниил Фоминых өзінің алғашқы кәсіби маусымын "Астана Про Тим" командасының мүшесі ретінде 22 жасында бастады. Ол бірден "Фландрия туры", "Париж – Рубэ" және "Испания Вуэльтасы" сияқты жарыстарға қатыса отырып, үлкен тәжірибе жинады. Осылайша қазақстандық шабандоздың велоспорттағы мансабы дұрыс бағытта дами бастады. Команда оған жекелей жарыстарда шеберлігін арттыруына үлкен көңіл бөлді. Даниил өзінің қабілетінің жоғары деңгейде екенін көрсетті. Бірақ, 2016 жылы Даниил Фоминых ауыр сынақтан өтуге мәжбүр болды. "Париж-Ниццаның" 7-ші кезеңінде жарыс жолында құлап, спортшы ауыр жарақат алды және толықтай бабына қайта келу үшін маусымның көп бөлігіне қатыса алмады.
Қайта бабына келу, әсіресе психологиялық тұрғыдан алғанда спортшы көп күш жұмсады. Бірақ, команда бұл қиын кезеңді жеңіп қана қоймай, одан да мықты болып шығу үшін бәрін жасады. Одан кейінгі төрт маусымда Даниил Фоминых Әлемдік Турда Қазақстан атынан жоғары дәрежеде өнер көрсететіп, шабандоз команда көшбасшыларына көмектесті. Ұлттық және Азия чемпионаттарының жеңіс тұғырына көтеріліп, командалық мақсаттарға жету үшін 100 пайыз барын салды.
2020 жыл бәріне оңай болған жоқ. Даниил Фоминыхтың маусым соңында "Астана Про Тим" командасынан кететіні өкінішті. Бұл кәсіби велоспорт. Сондықтан ол әрдайым жаңа қадамдар жасауға талпынып тұрады. Қазақстандық шабандоздың елордалық команда сапынан кетуіне байланысты клуб басшылығы оған "Астана Про Тим" сапында өткізген жеті маусым үшін, атқарған ауқымды жұмысы мен көшбасшыларға Әлемдік деңгейдегі жарыстарда қолдау көрсеткені үшін алғысын білдірді.
""Астана Про Тим" командасы Даниил Фоминыхқа жылдар бойы жоғары деңгейде өнер көрсеткені үшін алғыс айтады және шабандозға болашақта барлық жақсылықтарды тілейді!", - деп жазды елордалық велоклубтың баспасөз қызметы.
Ермұхамед Мәулен
