Combat Sports Anti-Doping (CSAD) ұйымы қазақстандық спортшы Әліби Ыдырыстың UFC-дің антидопингтік саясатын (UFC ADP) бұзғаны үшін 12 айға дисквалификация алғанын хабарлады.
Әлібидің сынамасы тыйым салынған зат – гидрохлоротиазидке оң нәтиже көрсетті. Бұл диуретик UFC-дің тыйым салынған препараттар тізіміндегі "Диуретиктер және бүркемелеуші агенттер" санатына жатады және кез келген уақытта қолдануға болмайды. Бұл туралы UFC-дің ресми сайты мәлімдеді.
Сынама 2026 жылғы 21 ақпанда АҚШ-тың Техас штатындағы Хьюстон қаласында өткен UFC Fight Night турнирі кезінде алынған. Сол кеште Ыдырыс Оде Осборнды жеңген болатын.
Сынама нәтижесі туралы хабарланғаннан кейін Ыдырыс CSAD-пен толық ынтымақтастық танытты. Ол гидрохлоротиазид құрамындағы өнімді жекпе-жек аптасының бейсенбі күні қабылдағанын айтты. Оның мақсаты 2026 жылғы 20 ақпанда өткен ресми салмақ өлшеу рәсімінде келісілген салмаққа түсу болған. Алайда, спортшының толық ынтымақтастығына қарамастан, CSAD жаза мерзімін қысқартқан жоқ. Себебі жекпе-жек аптасында диуретикті саналы түрде қолдану және салмақ қуу кезінде артықшылыққа ие болу – құқықбұзушылық болып есептеледі, – делінген UFC-дің ресми мәлімдемесінде.
Осылайша Әліби Ыдырыс 2026 жылғы 21 ақпаннан 2027 жылғы 21 ақпанға дейін UFC-ден шеттетілді.
