Норвегияда күрес түрлерінен әлем чемпионаты мәресіне жетті. Ослода өткен Әлем чемпионатында қазақстандық Алмат Кебіспаев грек-рим күресінен 67 келі салмақ дәрежесі бойынша қола жүлдегер атанды. Қола үшін жекпе-жекте ол түрік Мұрат Фиратпен кездесіп, оны 7: 4 есебімен жеңді.
Әлем чемпионатының қола жүлдегері атанған Алмат Кебіспаев қолдау көрсеткен жанкүйерлеріне алғысын айтты.
"Ослодағы әлем чемпионатының соңғы күнінде жүлдеге қол жеткіздік. Баршаңыздың қолдауларыңызға рахмет! Бұл барлығымыздың, бапкерлер бар, құрама мүшелерімен бірге жеткен жетістік. Өте қуаныштымын! Сіздерге осындай жүлде сыйлағаныма қуаныштымын!", - дейді Алмат.
Айта кетейік, Кебіспаев Азияның екі дүркін чемпионы, сонымен қатар Әлем чемпионатының күміс және үш дүркін қола жүлдегері.
Ал жалпы қазақстандық спортшылардан биылғы әлем чемпионатында алғашқы медальді 8-қазан күні Жәмилә Бақбергенова жеңіп алған болатын. Ол Әлем чемпионатының күміс жүлдегері атанды. 72 келіге дейінгі салмақ дәрежесі бойынша финалда қазақстандық спортшы қыз жапониялық Масако Фуруйтиден ұтылды.
Осылайша Жәмилә Бақбергенова елімізге күміс жүлдемен оралды. Спортшыны әуежайда жанкүйерлер қарсы алды.
"Мен жанкүйерлердің шынайы қолдауын сезіндім. Маған қолдау көрсеткендердің барлығына үлкен рахмет! Әлем чемпионатында күміс медаль алдым. Әрине, алтын жүлде алғым келді. Бірақ, меніңше, солай болуы тиіс шығар. Жапониялық Масако Фуруйтимен боз кілемде төртінші рет кездестім. Оған үш мәрте есе жібердім. Иван Ярыгин турнирінде ғана оны ұттым. Олимпиадалық салмаққа өту жоспарымда бар. Енді Азия ойындары мен басқа да ірі жарыстарға дайындықты бастаймын", - деді Жәмилә Бақбергенова.
Ермұхамед Мәулен
