Рафаэль Уразбахтиннің шәкірттері жергілікті "Спортингке" қарсы алаңға шығады.
Кездесу 18 қыркүйектен 19 қыркүйекке қараған түні "Жозе Алваладе" стадионында өтеді. 50 мыңнан астам жанкүйерді сыйдыратын аренадағы ойын Қазақстан уақытымен түнгі 00:00-де басталады. Бұл матч – "Қайрат" тарихындағы Чемпиондар лигасының топтық кезеңіндегі тұңғыш кездесу болмақ.
Қарсылас та осал емес. "Спортинг" – Португалияның ең атақты клубтарының бірі. Команда 21 рет ел чемпионы атанып, 18 мәрте Кубокты, 8 рет Суперкубокты және 4 мәрте Лига кубогын иеленген.
Топтық кезеңде "Қайрат" барлығы 8 ойын өткізеді: төртеуі өз алаңында, төртеуі сыртта. Жалпы кестеде алғашқы 8 орынға тұрақтаған клубтар плей-оффқа тікелей жолдама алады. Ал 9-24 орын арасындағы командалар қосымша ойындар өткізеді. Сол матчтарда жеңілгендер мен 25-36 орынға тұрақтаған ұжымдар еуромаусымдағы жолын аяқтайды.
