Әлемдік рейтингте әйелдер арасында жұптық сында 13-орында тұрған Анна Данилина Бейжіңде өтіп жатқан Сhina Open WTA 1000 турнирін сәтті бастады. Қазақстандық теннисші бұл жарыста сербиялық Александра Круничпен (№35) бірге өнер көрсетуде.
Алғашқы айналымда 30 жастағы Данилина мен 32 жастағы Круничке поляк қызы Магда Линетт пен даниялық Клара Таусон қарсы тұрды. Кездесу қазақстандық-сербиялық жұптың жеңісімен аяқталды. Қорытынды есеп – 6:4, 6:2.
Енді олар 1/4 финалға жолдама үшін америкалық Николь Меликармен (№17) және ресейлік Людмила Самсоновамен (№47) ойнайды.
Айта кетейік, Бейжіңдегі турнирдің жалпы жүлде қоры 8,96 миллион АҚШ долларын (4,87 миллиард теңге) құрайды.
Бұған дейін Қазақстанның үздік теннисшісі Елена Рыбакина (№10) Бейжіңдегі осы турнирде жекелей сында күтпеген жерден жарысты ерте аяқтады. 1/16 финалда 26 жастағы Рыбакина неміс теннисшісі Ева Лиске есе жіберді. Екі сағат 16 минутқа созылған матч 6:3, 1:6, 6:4 есебімен Ева Листің жеңісімен аяқталды.
