DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 324,92 Brent 36,55
Әскерилердің баспаналы болу мүмкіндігі жоғары

Әскерилердің баспаналы болу мүмкіндігі жоғары

Қазақстан тұрғын үй құрылыс жинақ банкі әскери қызметкерлердің тұрғын үй бағдарламасына қатысуын жеңілдетті. 

04 Мамыр 2019 10:56 11204

Әскерилердің баспаналы болу мүмкіндігі жоғары

Автор:

Фархат Әміренов

Әскерилер мен арнайы мемлекеттік орган қызметкерлерінің Қазақстан тұрғын үй құрылыс жинақ банкі арқылы пәтер сатып алу мүмкіндігі артты. Бұдан былай оларға пәтер үлестіру конкурсына қатысудың қажеті жоқ. Өйткені Тұрғын үй құрылыс жинақ банкі «әскери өнімнің» шарттарын оңтайландырды.

Нақтырақ айтсақ, 2019 жылдың мамыр айынан бастап әскерилер мен арнайы мемлекеттік мекеме қызметкерлеріне тұрғын үй алуға берілетін кредит бірыңғай талаптар бойынша үлестіріледі. Яғни кредит жылдық 8 пайыз мөлшерлемемен беріледі. Сондай-ақ бастапқы жарна ретінде тиісті соманың 15 пайызын салу қажет.   

Бұл ретте тұрғын үйді таңдауда ешқандай шектеу жоқ. Берілген кредитке су жаңа пәтер сатып алуға болады немесе тұрғын үйдің үлестік құрылысына қатысу мүмкіндігі бар. Сондай-ақ қайталама нарықтан пәтер сатып алуға жұмсауға да болады. Атап өтерлігі, тұрғын үйге қажетті кредитке баспаның жөндеу жұмыстарына жұмсалатын шығынды да қосып алуға да рұқсат етілген. 

Сонымен қатар жаңа тұрғын үй бағдарламасына басында жеке баспанасы бар, бірақ өз ведомствасы бойынша баспанаға мұқтаж деп танылған әскери қызметкерлер де қатыса алады.

«Жаңаланған тұрғын үй бағдарламасы бойынша 16 млн теңге көлеміндегі алғашқы кредит талдықорғандық әскери қызметкерге мақұлданды. Бұған дейін ата-анасымен бірге тұрып келген үш баласы бар отбасы енді жаңа үйдегі 4 бөлмелі пәтерге көшеді. Біздің болжамға сәйкес, биыл 4 мыңдай әскери қызметкер қоныс тойын тойлауы мүмкін. Банк оларға кредит беруге 59 млрд теңге бөлді», – деді Қазақстан тұрғын үй құрылыс жинақ банкінің басқарма төрағасы Ләззат Ибрагимова.

«Әскери өнім» бойынша берілетін кредит сомасы тұрғын үй төлемдерінің мөлшеріне байланысты есептеледі. Ал төлем мөлшері әрбір өңірге және отбасына құрамына тікелей байланысты. Яғни үлкен отбасыға үлкен пәтер беріледі. Сондықтан мамандар отбасын әлі құрмаған және сәби күтіп отырған әскери қызметкерлерге асығыстық танытудың қажеті жоқ дейді. Бұл жағдайда оларға тиімдісі – қаржысын тұрғын үй құрылыс жинақ банкіне одан әрі жинай беру. Осылайша олар алдағы уақытта тұрғын үй құрылыс жинақ жүйесінің классикалық схемасына сәйкес, яғни 3,5-5 пайыздық жылдық мөлшерлемемен баспаналы бола алады.

Еске сала кетейік, былтыр әскерилердің тұрғын үй төлемдерін пайдалану механизмі өзгерген болатын. Өзгеріске сәйкес, олар тұрғын үй төлемдерін жалға алып отырған баспананың пәтерақысын төлеп қана қоймай, өзінің жеке пәтеріне жинауға да мүмкіндік алған. Отан қорғаушыларды қолдау мақсатында Қазақстан тұрғын үй құрылыс жинақ банкі арнайы қаржы бөліп, олар үшін арнайы тұрғын үй бағдарламасын әзірледі. Бағдарлама 2025 жылға дейін жұмыс істейді. Өткен жылдың қыркүйек айынан бастап 2,5 мыңнан астам адам «әскери өнімді» пайдаланып, баспаналы болды.

Деректерге сүйенсек, қазіргі таңда 70 мыңнан астам әскери қызметкер тұрғын үй құрылыс жинақ банкінен шот ашып, мемлекеттен алатын тұрғын үй төлемдерін сонда аударып отыр. Осы орайда банктегі арнайы салымдардың барлығы ерекше мәртебеге ие екенін атап өткен жөн. Сондай-ақ оларға ешкім қол сұға алмайды. Өйткені, кепілдік берілген. Атап айтқанда, әскери қызметкерлердің салымын бюджет үшін тартып ала алмайды, бұғаттау да мүмкін емес. Екінші деңгейлі басқа банктер өтелмеген несие үшін аталған салымдарға қандайда бір талап қоя алмайды.

Фархат Әміренов

inbusiness.kz-ті қараңыз, оқыңыз :

«5-10-20»: Павлодардағы үйлердің бағасы 12 млн теңгеден аспауы керек

Жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге.

22 Мамыр 2020 15:23 971

«5-10-20»: Павлодардағы үйлердің бағасы 12 млн теңгеден аспауы керек

Ел президенті тұрғын үй кезегінде тұрған азаматтардың баспана мәселесін шешу үшін «Нұрлы жер» бағдарламасының кезекті бағыты ретінде «5-10-20» ипотекалық бағдарламасын әзірлеуді тапсырды. Қазір жаңа бағдарламаның талаптары жан-жақты пысықталып, қанатқақты жоба ретінде қарастырылуда. Бағдарлама 1 шілдеде қабылданады деген болжам бар.

«Тұрғын үй құрылыс жинақ банкі» АҚ Павлодар облыстық филиалының директоры Талғат Баиловтың айтуынша, қазірдің өзінде бірқатар талаптары белгілі. Біріншіден, баспана алуға ниетті тұрғын жергілікті атқару органында тұрғын үй кезегінде тұруға тиіс. Екіншіден, алғашқы жарна ретінде пәтер құнының кемінде 10 пайызын төлеуі керек. Сол кезде ипотекалық несие 5 пайыздық мөлшерлемемен 20 жылға дейін беріледі.

«Павлодар облысында жеке құрылыс компаниялары ұсынған жаңа үйлердің бағасы 12 млн теңгеден аспауы керек. Ал жергілікті әкімдіктер салған несиелік үйлердің бір шаршы метрі үшін белгіленген баға – 160 мың теңге. Осы сомадан аспауы керек», – дейді Талғат Баилов.

Сонымен қатар, «Тұрғын үй құрылыс жинақ банкі» жанынан жыл соңына дейін «Отбасы банкі» құрылады. Бұл институт баспанаға мұқтаж азаматтарды есепке алу, тіркеу және тұрғын үйді үлестірумен айналысатын болады.

«Тұрғын үй кезегіндегі азаматтардың қай бағдарлама бойынша баспаналы болатыны тұрғын үй қолжетімділігі сатысына сәйкес бағаланады. Атап айтқанда, табысы төмен, яғни отбасының бір айлық кірісі жан басына шаққанда бір күнкөріс минимумынан аспайтын отбасыларға сатып алу құқығынсыз үйді жалға алу мүмкіндігі ұсынылады. Екі күнкөріс минимумына дейін табыс табатын көпбалалы, толық емес және мүмкіндігі шектеулі балаларды тәрбиелеп отырған отбасылар «Бақытты отбасы» бағдарламасына, ал 3,1 күнкөріс минимумына дейін табысқа ие баспанасыз отбасылар «5-10-20» жобасына қатыса алады. 2020 жылдың 1 сәуірінен бастап күнкөріс минимумы 32 668 теңгеге дейін өсті. Осылайша, «5-10-20» арқылы баспаналы болу үшін жан басына шаққандағы отбасы табысы 101 270 теңгеден аспауы тиіс», – деді Талғат Баилов.

Оның сөзінше, «Бақытты отбасы» бағдарламасында төлем қабілеттілігін растау кезінде мемлекеттен алатын түрлі төлемдер есептеледі. Ал «5-10-20» бағдарламасына қатысты мұндай талаптың болар-болмасы әзірше белгісіз.

«Павлодар облысында тұрғын үй кезегінде тұрған адам «5-10-20» бағдарламасы бойынша басқа аймақтан үй ала алмайды. Бүгінде аймағымызда 27 мыңнан астам адам кезекте тұр. Олар аталмыш бағдарлама арқылы Павлодар облысының аудан-қалаларынан ғана баспаналы бола алады», – деді облыстық филиал директоры.

Тұрғындар үшін тиімді жобаларының бірі - «Бақытты отбасы» бағдарламасы. Бағдарлама арқылы тұрғын үй кезегінде тұрғандар үй бағасының 10 пайызын алғашқы жарна ретінде төлеп, 20 жылға дейін жылдық 2 пайыздық мөлшерлемемен несие ала алады.

«Наурыз айында Павлодар қалалық қаржы бөлімі 497 өтінішті қабылдап, түрлі себепке байланысты 15 өтінішті кері қайтарды. Қалған 482 өтінішті қарастырып, біздің банкке 338 жолдама берді. «Тұрғын үй құрылыс жинақ банкі» аталмыш бағдарлама бойынша өтініштерді қарастыру үшін міндетті түрде жергілікті әкімдіктен жолдама берілуі керек. Бүгінде 338 өтініштің 76-сы мақұлданды», – деді Талғат Баилов.

Фархат Әміренов

9 мың жас азамат жалға берілетін тұрғын үй алады

ТМД елдері арасында Қазақстанда ең көп баспана салынған.  

28 Ақпан 2020 19:56 3999

9 мың жас азамат жалға берілетін тұрғын үй алады

Индустрия және инфрақұрылымдық даму министрлігінің Құрылыс және тұрғын үй-коммуналдық шаруашылық істері комитетінің төрағасы Мархабат Жайымбетов еліміз тұрғын үй салу бойынша ТМД елдері арасындағы ең жоғары көрсеткішке ие екенін мәлім етті.

Мархабат Жайымбетовтың айтуынша, тұрғын үйді пайдалануға беру көрсеткіші бойынша еліміз Тәуелсіз мемлекеттер достастығы елдері арасында ең жоғары көрсеткішке қол жеткізген. 18,3 млн адам бар елімізде бір тұрғынға баспана беруі – 0,71 шаршы метр. Ресейде – 0,54 ш.м., Белоруссия – 0,40 ш. м., Өзбекстан – 0,36 ш. м.

Мархабат Жайымбетов халықтың әлеуметтік осал топтарының тұрғын үй мәселесі ерекше бақылауда тұрғанын айтты.

«Мемлекет басшысының тапсырмасы бойынша үш жыл ішінде әсіресе аз қамтылған көпбалалы отбасыларды баспанамен қамтамасыз етуді жоспарлап отырмыз. Бұл үшін тұрғын үй заңдарына заңнамалық түзетулер енгізілді және «Нұрлы жер» бағдарламасы арқылы қаржыландыру тетіктері көзделген. Осы санаттағы 40 мыңнан астам кезекте тұрғандардың ішінде 2019 жылы түрлі тетіктер арқылы 7 387 отбасы тұрғын үймен қамтамасыз етілді», – деді комитет төрағасы.

Баспана беруде жастарға да көңіл бөлінуде.

«Елбасы жариялаған Жастар жылы аясында Нұр-Сұлтан, Алматы және Шымкент қалаларында жұмыс істеп жатқан жастардың тұрғын үй мәселесін шешу шаралары қабылданды. 2019-2021 жылдары жастардың 9 мың азаматын жалға берілетін тұрғын үймен қамтамасыз ету көзделіп отыр, 5 жылдық кезеңде осындай пәтерлерде тұрып, тұрғын үй құрылыс жинақ жүйесі бойынша өз тұрғын үйіне қаражат жинауға міндетті. 2019 жылы мұндай баспана 3004 қатысушыға берілді», – деді Мархабат Жайымбетов.

Нұржан Көшкін

 

inbusiness.kz-ті қараңыз, оқыңыз :

Жаңалықтарға жазылу: