Футболдан Қазақстан чемпионатының оныншы турында "Астана" "Қызыл-Жарды" ұтты. "Астана Аренада" өткен кездесу 3:2 есебімен аяқталды. Алаң иелері сапынан Вараздат Ароян (17-минут), Марин Томасов (27-ші) және Эльхан Астанов (90+7) гол соқты. Осы жеңістің арқасында елордалық клуб 25 ұпай жинап, турнирлік кестеде екінші орыннан бірінші орынға көтерілсе, петропавлдықтар (22) керісінше екінші орынға түсті. Келесі турда 28 мамыр күні "Қызыл-Жар" өз алаңында "Ордабасыны" қабылдаса, "Астана" сырт алаңда "Атыраумен" ойнайды.
Сонымен қатар Қазақстан чемпионатының оныншы турында "Шахтер" "Ақсуды" ұтты. Қарағандыда өткен кездесу 2:1 есебімен аяқталды. Алаң иелері сапынан бірінші болып Иван Свиридов 44-минутта гол соқты. Бірақ қарағандылық команданың қуанышы ұзаққа созылмады. Өйткені 45+3 минутта Дамир Марат қарымта голды соқты. 90+1-ші минутта "Шахтер" Максим Галкиннің голының арқасында қарсыласын тізе бүктірді. Осы табысының арқасында "Шахтер" 11 ұпаймен турнирлік кестеде тоғызыншы орынға жайғасты. Ал "Ақсу" 4 ұпаймен турнир кестесінің соңғы, 13-ші қатарында қалды. Келесі турда 27 мамырда "Шахтер" сырт алаңда "Каспиймен" ойнаса, "Ақсу" өз алаңында "Жетісуды" қабылдайды.
Ел чемпионатының оныншы турында "Жетісу" ірі жеңіліске ұшырап, "Атыраудан" ұтылды (0:3). Қонақтар сапынан Евгений Козлов (5-минут), Нсунгуси Эффионг (24-ші) және Игорь Стасевич (58-ші) гол соқты. Осы ойыннан кейін 17 ұпай жинаған атыраулықтар алтыншы орынға жайғасса, активінде 10 ұпайы бар талдықорғандықтар турнир кестесінің 11-ші қатарында қалды. Келесі турда 27 мамыр күні "Жетісу" сырт алаңда "Ақсумен" кездессе, 28 мамыр күні "Атырау" өз алаңында "Астананы" қабылдайды.
