Қазақстан тарихындағы WTA 250 сериялы алғашқы халықаралық турнир - Astana Open керемет финалдық ойынмен аяқталды. Жарыстан алған эмоцияны айтып жеткізу қиын. Елордада өткен шешуші матчта турнирдің бірінші ракеткасы болып тіркелген Юлияның қарсыласы WTA рейтингінде 89-шы орында тұрған бельгиялық Элисон Ван Эйтванк болды.
Небәрі 25 минутқа созылған бірінші сетте үш брейк-пойнт жасаған Путинцева Ван Эйтванктан 6:1 есебімен басым түсті.
Бельгиялық теннисші екінші партияны брейкпен бастады. Алайда, төртінші геймде Юлия есепті теңестірді. Содан кейін 3: 2 есебімен алға шықты. Жетінші және сегізінші геймде қарсыластар брейкпен алмасты. Соған қарамастан Элисон екінші сетте 6:4 есебімен жеңіске жетті.
Шешуші сет екінші кезеңнің сценарийі бойынша өтті. Брейкпен басталған кезеңнің жетінші геймінде Юлия допты ойынға қосқанда бельгиялық тағы да ұпай еншілеп, есепті 5:3-ке жеткізді. Нәтижесінде Ван Эйтванк 6:4 есебімен жеңді.
Astana Open-дегі жеңіс Ван Эйтванктің мансабындағы бесінші жеңіс. Ол 29 200 АҚШ доллары көлемінде ақшалай сыйлық пен 280 рейтингтік ұпайға ие болды.
Ермұхамед Мәулен
