Astana Open: Зарина Дияс пен Юлия Путинцева екінші айналымға шықты

745

Өкінішке орай, жекелей сында қазақстандық теннисші Анна Данилина жарыстан шығып қалды. Дегенмен жұптық сында өнер көрсетуін одан әрі жалғастырады.

Astana Open: Зарина Дияс пен Юлия Путинцева екінші айналымға шықты

Зарина Дияс Astana Open WTA 250 турнирінің екінші айналымына шықты, деп хабарлайды ҚТФ баспасөз қызметі. Әлемнің 109-ракеткасы Зарина бастапқы кездесуін дүниежүзілік рейтингте 210-орында тұрған 19 жастағы ресейлік Анастасия Захаровамен өткізді. Бірінші партияда тай-брейкте Зарина Дияс басым түсті - 7:6 (8:6). Екіншісінде қарсыласы есе қайырды - 6:4. Үшінші, шешуші сетте алдымен Зарина алға шыққанымен, ресейлік теннисші таразы басын теңестірді. Дегенмен Зарина тартысты өткен матчты жеңіспен түйіндей білді. З.Дияс екінші айналымда әлемнің 86-ракеткасы, швециялық Ребекка Петерсонмен шеберлік байқасады. Ол рейтингте 121-сатыдағы швейцариялық Штефани Фегелені 7:5, 4:6, 6:3 есебімен тізе бүктірді.

Сонымен қатар әлемнің 47-ракеткасы Юлия Путинцева да Astana Open WTA 250 турнирін сәтті бастады. Елімізде алғаш рет осындай жоғары деңгейде өтіп жатқан жарыстың бірінші ракеткасы болып тіркелген қазақстандық теннисші бірінші айналымда рейтингіде 162-орында тұрған грузиялық Екатерина Горгодземен кездесті. Ю.Путинцева қарсыласын 6:1, 6:2 есебімен оңай ұтты. Бір сағаттан астам уақытқа созылған матчта Путинцева 1 эйс жасап, 5 брейк-пойнттың төртеуін пайдалана білді. Горгодзе 1 эйспен шектеліп, брейкке қол жеткізе алған жоқ. Ю.Путинцеваның келесі қарсыласы - Беларусь өкілі, рейтингіде 408-сатыдағы Вера Лапко. Ол бастапқы кездесуінде германиялық Юле Нимайерді ұтты - 7:5, 4:6, 6:4.

Анна Данилина Astana Open WTA 250 турнирінің екінші айналымына шыға алмады. Дүниежүзілік рейтингте 287-орында тұрған қазақстандық теннисші алғашқы айналымда әлемнің 62-інші, осы жарыстың 3-ракеткасы, франциялық Кристина Младеновичпен шеберлік байқасты. Бірінші партияда Младенович басымдылық танытты - 6:4. Екіншісінде Данилина тай-брейкте сәттірек ойнады - 7:6 (7:5). Үшінші, шешуші партияда жеңіс франциялық спортшының қанжығасында кетті - 6:4. Үш сағатқа жуық уақытқа созылған тартысты матчта Данилина 2 эйс жасап, 16 брейк-пойнтттың тоғызын пайдаланды. Қарсыласы 11 брейкке (16 брейк-пойнт) қол жеткізді. Осылайша А.Данилина жекелей сында жарыс жолынан шығып қалды. Дегенмен ол жұптық сында доданы жалғастырады.

Ермұхамед Мәулен

Telegram
ПОДПИСЫВАЙТЕСЬ НА НАС В TELEGRAM Узнавайте о новостях первыми
Подписаться