"Астана" Премьер-лиганың 21-туры матчында "Жетісуды" жеңді. Алматыдағы "Жас Қыран" стадионында өткен кездесу 2:1 есебімен аяқталды.
Кездесудегі алғашқы голдың авторы төртінші минутта көзге түскен талдықорғандық команданың беларусь қорғаушысы Андрей Залески болды. 61-минутта Марин Томасов есепті теңестірді. Содан кейін Кипр құрамасының шабуылшысы Пиерос Сотириу 81-ші минутта жеңіс голын соқты. Үш ұпайға ие болған "Астана" 33 ұпаймен үшінші орында тұр. "Жетісу" 25 ұпаймен жетінші орында қала берді.
Сонымен қатар бүгін қызылордалық "Қайсар" "Қызыл-Жар СК" командасына есе жіберді. Кездесу Талғар қаласында өтіп, 2:1 есебімен номиналды қонақтардың пайдасына аяқталды. Алғашқы голды 20-минутта "Қызыл-Жар" футболшысы Максим Скорых соқты. Қызылордалықтар 44-минутта Елжас Алтынбековтің дәл соққысымен жауап берді. Үзілістен кейін, 79-минутта, Қазақстан жастар құрамасының қорғаушысы Әлібек Қасым "Қызыл-Жар СК-ға" жеңіс әкелді. "Қайсар" үшін бұл чемпионаттағы соңғы матч болса, "Қызыл-Жар СК" маусымның соңғы ойынын "Астанамен" 30 қарашада өткізеді.
Қазақстан Премьер-лигасының 21-тур матчында "Шахтер" "Каспийді" ірі есеппен жеңді. Кездесу 4:0 есебімен қарағандылық клубтың пайдасына аяқталды.
Үш голды бірінші таймда "Шахтер" ойыншылары соқты. Алдымен, 18-минутта есепті ресейлік жартылай қорғаушы Арсен Хубулов ашты. 27-минутта қазақстандық шабуылшы Айдос Таттыбаев есепті еселей түсті. 38 минутта Хубулов дубль жасады. Кездесудің нүктесі 89-минутта қойылды. Ақтау командасына қарсы төртінші голды қазақстандық жартылай қорғаушы Жан-Али Пируз соқты.
Үш ұпай жинаған "Шахтер" турнир кестесіндегі бесінші орыннан төртінші орынға көтеріліп, "Ордабасыны" еуропалық жарыс аймағынан ығыстырды.
Ермұхамед Мәулен
