Асу Алмабаев тарихи жекпе-жекке қатысты ойын айтты

482

Бүгін, 27 ақпанда Лас-Вегаста аралас жекпе-жек шебері Асу Алмабаевтың қатысуымен баспасөз конференциясы өтті. 

Асу Алмабаев тарихи жекпе-жекке қатысты ойын айтты Фото: ufceurasia / asu_zulfikar57

Қазақстандық спортшы алғаш рет UFC турнирінің басты жекпе-жегіне қатысып, әлемдік промоушеннің негізгі кардын бастамақ.

Бұл Қазақстан ММА тарихындағы маңызды оқиға. Журналистермен кездесу барысында Асу Алмабаев алдағы қарсыласы, рейтингте жеңіл салмақтағы дивизионның 6-орнында тұрған португалиялық Манель Капемен өтетін жекпе-жекке дайындығы туралы ой бөлісті.

Алмабаев үшін бұл жекпе-жек өзінің деңгейін дәлелдеп, дивизионның ең мықты файтерлерінің қатарына қосылуға үлкен мүмкіндік.

"Келесі белбеу үміткері екенімді дәлелдеймін",  деп спортшы UFC-де чемпиондық белбеу үшін күресуге дайын екенін мәлімдеді.

Асу қарсыласының осал емес екендігін де атап өтті. Манель Капенің басты қаруы – оның техникасы, сондықтан жекпе-жек қиын сынақ болмақ.

"Осындай жекпе-жекте қарсыластан барлығын күтуге болады. Біз мұнда шахмат ойнамаймыз  біз күресеміз және мен кез келген жағдайға дайынмын",  деп қоса кетті Асу.

Бұл сөздер Алмабаевтың тек физикалық емес, тактикалық тұрғыдан да дайын екенін көрсетеді. UFC-дегі әр секунд жекпе-жектің тағдырын шешетінін ескерсек, мұндай дайындық аса маңызды.

2 наурызда UFC Fight Night 253 аясында өтетін Асу Алмабаев пен Манель Капенің жекпе-жегі жылдың ең жарқын оқиғаларының бірі болмақ. Қазақстандық ережесіз жекпе-жек шебері тек өз елін әлемдік деңгейде танытып қоймай, болашақ жас буынға үлкен үлгі көрсетеді.

Айта кетейік, Асу Алмабаев UFC-дегі дебюттік жекпе-жегін 2023 жылы өткізді және промоушенде осы уақытқа дейін төрт жекпе-жекке шықты.

Қазіргі уақытта Асу жүз пайыздық жеңіс статистикасына ие және жеңіл салмақ дәрежесінде 8-орында тұр. Егер ол Капені жеңсе, чемпион Алешандре Пантожаға қарсы титулдық жекпе-жекке үміткер атанады.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу
Telegram арнамызға жазылыңыз! Жаңалықтар туралы бірінші біліңіз
Жазылу