Парижде (Франция) өткен XXXIII Жазғы Олимпиада ойындарының бокс турнирінің жеңімпазы, алжирлік Иман Хелиф 2028 жылы АҚШ-тың Лос-Анджелес қаласында өтетін Олимпиада алдында салмақ дәрежесін өзгертуді жоспарлап отырғанын мәлімдеді.
"Менің басты мақсатым – 2028 жылы екінші олимпиадалық алтын медальді жеңіп алу. Сондай-ақ, кәсіби деңгейге дайындық. Бәрін мінсіз жасағым келеді және Парижге қарағанда Лос-Анджелеске әлдеқайда жақсы формада барғым келеді. Себебі қазір менің менталдық және физикалық тепе-теңдігім бұрынғыдан жақсырақ. Маған 70 келі салмақ дәрежесіне көтерілуге тура келеді. Парижде мен 66 келіде жеңіске жеттім және салмақ қосу мен үшін қиындық тудырмайды деп ойлаймын. Бойым – 180 см. Қазіргі таңда жаңа дивизионға бейімделу үшін командаммен жұмыс істеп жатырмын", – деп келтіреді Хелифтің сөзін Marca басылымы.
Естеріңізге сала кетейік, Хелифтің Олимпиадаға қатысуы кейбір қарсыластарының наразылығын тудырды.
Италиялық боксшы Анджела Карини 1/8 финалдағы жекпе-жектің басында-ақ рингтен кетіп қалды. Ал, Хелифке трансгендер деген айып тағылып, боксшының басы дауға қалды.
