Алматы қаласы Қоғамдық денсаулық сақтау басқармасы мен AYALA ҚҚ арасындағы меморандум Ұрықты қорғау орталығын және қаланың неонаталдық қызметін дамыту мәселелері бойынша күш-жігерді үйлестіруге және өзара іс-қимылға, сондай-ақ ретинопатия салдарынан жаңа туған сәбилердің мүгедектігін төмендетуге бағытталған, деп жазады inbusiness.kz сайты.
"Біз AYALA қайырымдылық қорының Алматыдағы балалар денсаулығын дамытуға қосқан көп жылдық үлесін жоғары бағалаймыз. Қордың неонатологиядағы орасан зор тәжірибесі мен көп жылдық сараптамасы, сондай-ақ қор басшылығының елге және біздің қалаға пайда әкелуге деген үлкен азаматтық ұмтылысы әсерлі нәтижелерге алып келді. AYALA қорының күш-жігерінің арқасында Алматыда 1 жасқа дейінгі нәрестелердің жүрегіне ота жасала бастады. Барлық перинаталдық реанимациялар алғаш рет ерте туған нәрестелерді емдеуге арналған алдыңғы қатарлы жабдықтармен, ретинопатияны диагностикалау және емдеуге арналған жабдықтармен жабдықталды. Басқарманың және кәсіби ҮЕҰ-ның біріккен күш-жігері қаламыздың неонаталдық қызметін нығайту үшін одан әрі көзге көрінетін және жағымды нәтижелер әкелетініне сенімдіміз", - деп атап өтті Алматы қаласы ҚДБ басшысы Иран Маратұлы Шаметеков.
Қазақстанда сәби мүгедектігін азайту – AYALA қайырымдылық қоры жұмысының басты мақсаты. Бұл елдегі неонатологиядағы проблемаларға маманданған жалғыз қор. Қор 17 жыл бойы Қазақстаннан тыс жерде емес, ел аумағында балалардың өмірі мен функционалдық денсаулығын сақтап қалуға күш салуда. Бұл үшін AYALA заманауи медициналық жабдықтарды балалар ауруханаларына, перзентханаларға, еліміздің перинаталдық және ғылыми орталықтарына тапсырады.
2007 жылдан бастап Алматы қаласының балалар денсаулық сақтау саласын дамытуға қолдау көрсету үшін AYALA Қайырымдылық қоры қаланың 19 медициналық мекемесін реанимация жабдығымен жабдықтауға 682 млн теңгеден астам қаражат жұмсады. Қордың көмегін қалалық перинаталдық орталық, "Ақсай" республикалық балалар ауруханасы, Қалалық балалар клиникалық жұқпалы аурулар ауруханасы, Перинатология және балалар кардиохирургиясы орталығы, Акушерлік, гинекология және перинатология ғылыми орталығы, Сызғанов атындағы Ұлттық хирургия ғылыми орталығы, № 1 және № 2 Балалар ауруханалары, Қалалық жұқпалы аурулар ауруханасы, № 1, № 3, № 4, № 7, № 8 емханалар, № 1, № 2, № 4 және № 5 перзентханалар, Қалқамандағы № 7 қалалық клиникалық аурухана алды. Сондай-ақ, қор жиналған қаражатқа алматылық балалар дәрігерлерінің біліктілігін арттыру үшін оларды шетелде және Қазақстанда оқытты.
Қордың кешенді және жүйелі тәсілінің арқасында Алматыда он мыңдаған баланың өмірі құтқарылды.
Алматының Қоғамдық денсаулық сақтау басқармасына сенімі, ашықтығы және жаңа туған сәбилердің проблемалаына көңіл бөлгені үшін үлкен ризашылығымды білдіремін. Біз бұл үшін қор ұзақ жылдар бойы жинақтаған ресурстар, білімдер мен құзыреттер бере отырып, мемлекетке әрқашан да пайдалы болуға дайынбыз. Біз бірлескен күш-жігерімізбен бала мүгедектігіне байланысты жағдайды туғаннан бастап жақсарта аламыз деп үміттенеміз, - деп атап өтті AYALA қайырымдылық қорының негізін қалаушы және президенті Айдан Сүлейменова.
Бұған дейін AYALA қайырымдылық қоры ҚР Денсаулық сақтау министрлігімен 3 меморандумға қол қойған болатын.
- Бірінші Меморандум бойынша қордың жұмысының нәтижесі Қазақстанның перинаталдық орталықтарының барлық реанимацияларын өте шала туған балаларды емдеуге арналған жабдықтармен жабдықтау болды, бұл 2015 жылға қарай нәресте өлімі көрсеткішін 3,5 есеге төмендетуге мүмкіндік берді.
- Екінші Меморандум аясында қор еліміздің барлық перинаталдық орталықтарын автоматты гипотермияға арналған аппараттармен жабдықтап, 348 баланың өмірі мен денсаулығы сақталды.
- Үшінші Меморандум аясында қор республиканың 14 медициналық орталығына 14офтальмоскоп, 5 ретиналды камера, 5 лазерлік қондырғы және 84 "Луцентис" дәрі-дәрмегін тапсырды. Жабдықтарда, соның ішінде ангиогенез ингибиторының инъекциясының арқасында 4300-ден астам бала диагностикадан өтті, 380 бала толық соқырлықтан құтқарылды.
