Астанада AYALA қайырымдылық қоры UMC "Ана мен бала орталығымен" Қазақстанда феталды хирургия мен неонаталдық офтальмологияны дамытуға бағытталған Ынтымақтастық туралы меморандумға қол қойды, деп хабарлайды inbusiness.kz сайты.
UMC медициналық директоры Гүлмира Құрбанқызы Рәпілбекова бұл ынтымақтастықтың маңыздылығын атап өтті:
"Біздің UMC Ана мен бала орталығын және AYALA қайырымдылық қорын көпжылдық жемісті ынтымақтастықты байланыстырады. UMC пилоттық жобасынан Қазақстан бойынша перинаталдық орталықтарда автоматты гипотермияға арналған аппараттарды сәтті масштабтау және қолдану басталды. Қордың қолдауымен неонаталдық офтальмолог кабинеті заманауи диагностикалық техникамен жабдықталды. Қордың ретиналды камерасында 2023 жылдан бастап 1 176 жаңа туған нәресте диагностикаланды. Қор берген лазерлік қондырғыда 303 бала соқырлықтан құтқарылды. Біздің ынтымақтастығымыз алдағы уақытта да айтарлықтай нәтижелер беріп, біздің клиника дәрігерлерінің кәсіби біліктіліктерін дамытуға ықпал етеді деп үміттенеміз", – деді ол.
UMC клиникасы 2024 жылы Академиялық медициналық орталық ретінде JCI аккредитациясынан сәтті өткен Орта Азия аумағындағы алғашқы медициналық орталық болып табылады.
Өткен жылы AYALA қоры "Ана мен бала орталығының" феталды хирургтерін оқытуға көмектесті. Осының арқасында UMC-да ұрықтың дамуындағы құрсақ ішіндегі патологияларды түзету бойынша күрделі феталды оталар жасала бастады.
Назарбаев Университетінің Медицина жөніндегі вице-президент және Медицина мектебінің деканы Массимо Пиньятелли:
"UMC "Ана мен бала орталығының" феталды хирургия бойынша жобаны бастау үшін негізгі клиника ретінде таңдалуы өте орынды болып табылады. Біздің орталықта осы пациенттерді пренаталдық диагностикалау мен одан әрі бақылаудың барлық мүмкіндіктері бар. Цитогенетикалық зертхана, УДЗ, МРТ-диагностика, жүкті әйелдерді бақылауға және одан әрі қарауға арналған бөлімше, мамандандырылған неонаталдық хирургия бөлімшесі бар. Бұл феталды хирургия бойынша жобаны табысты іске асыруға тамаша жағдай жасайды", – деп атап өтті.
Қазақстандағы сәби мүгедектігін қысқарту – AYALA қайырымдылық қоры жұмысының басты мақсаты. 18 жыл бойы AYALA қоры заманауи медициналық жабдықтарды балалар ауруханаларына, перзентханаларға, еліміздің перинаталдық және ғылыми орталықтарына беріп, дәрігерлерге балалардың өмірі мен функционалдық денсаулығын сақтауға көмектесіп келеді.
UMC пен AYALA қайырымдылық қоры арасындағы меморандум Қазақстандағы медициналық стандарттарды жақсартуға және балалардың өмірін құтқаруға жаңа мүмкіндіктер ашады.
"Біздің қордың басты тәсілі – еліміздің жетекші медициналық орталықтарымен тікелей жұмыс істеу. Жабдықтармен жабдықтауға және дәрігерлердің біліктілігін арттыруға көмектесе отырып, біз толығымен медициналық мамандардың сараптамасына, тәжірибесіне және нақты қажеттіліктеріне сүйенеміз. Бұл ең қысқа мерзімде жаңа туған балалардың сақталған денсаулығында көрініс табатын максималды нәтижелерді алуға көмектеседі. UMC басшылығына біздің жемісті серіктестігіміз үшін алғыс айтамын", – деп атап өтті AYALA Қайырымдылық қорының негізін қалаушы және президенті Айдан Сүлейменова.
AYALA қайырымдылық қоры өз жобаларын ҚР Денсаулық сақтау министрлігімен 3 меморандум аясында жүзеге асырады. Бірінші Меморандум бойынша қор жұмысының нәтижесі Қазақстанның перинаталдық орталықтарының барлық реанимацияларын шала туған балаларға күтім жасауға арналған жабдықтармен жабдықтау болды, бұл 2015 жылға қарай нәресте өлімінің көрсеткішін 3,5 есеге төмендетуге мүмкіндік берді.
Екінші Меморандум шеңберінде Қор еліміздің барлық перинаталдық орталықтарының үштен бірін жүздеген балалардың өмірі құтқарылған автоматты гипотермияға арналған аппараттармен жарақтандырды.
Үшінші меморандум аясында қор 2022 жылдан бастап республиканың 22 медициналық орталығына 16 офтальмоскоп, 11 ретиналды камера, 6 лазерлік қондырғы және "Луцентис" препаратының 163 құтысын берді. Жабдықтарда 11 000-нан астам бала диагностикаланды, 500-ден астам шала туған балалар толық соқырлықтан құтқарылды.
