Дүйсенбіде Леонид Тамбиевтің шәкірттері өз айдынындағы матчтар сериясында СКА командасынан жеңіліп қалды(1:2). Санкт-Петербург ойыншыларынан жалғыз шайбаның авторы Тайлер Граовац болды. Ал "Барыс" өткен турда қонақта овертаймда нәтижелі жекпе-жек өткізіп, "Нефтехимик" (6:5) командасын жеңді. Понтус Оберг хет-трик жасап, Кирилл Савицкий мен Самат Данияр маусымдағы алғашқы шайбаларын соқты. Райли Барбер (матчта 1+3) және Давид Скленичка (0+3) өздерінің нәтижелі серияларын бес ойынға дейін ұзартты.
Елордалық команда ойыншыларына келер болсақ, Батырлан Мұратов жарақат алғандар тізімінен шығарылғанымен, қорғаушы Алекс Грант пен шабуылшы Дмитрий Гурков әлі жарақаттарынан айыққан жоқ. Сондай-ақ Роман Старченко да жарақат алғаннан кейін қалыпқа келуде.
"Барыс" пен "Адмиралдың" биылғы маусымдағы алғашқы кездесуі 4:3 есебімен, елордалық команданың жеңісімен аяқталған еді. Алайда бүгін "Адмирал" айласын асырды. Астанада өткен кездесудің негізгі уақыты 2:2 есебімен тең аяқталды. Бірінші кезеңде астаналықтар көзге түсе алмағандарымен, келесі екі кезеңде есе қайтарды. Қонақтар сапынан Джованни Фиоре (2-минут) мен Прохор Корбит (25-минутта) гол соқты. Ал Андрей Скабелка шәкірттері бұған Понтус Оберг (39-минут) пен Райли Барбердің (44-минут) дәл соққыларымен жауап берді. Нәтижесінде кездесу овертаймға ұласты.
Қарсыластар овертаймда да өзара мықтыны анықтай алмағандарымен, буллитте "Адмирал" хоккейшілерінің жолы болды – 2:1. Бүгінгі сәтсіздікке қарамастан, он ұпаймен "Барыс" Шығыс конференциясының кестесінде тоғызыншы орында қалды. Сегіз ұпай жинаған "Адмирал" соңғы 12- орыннан 11- орынға көтеріліп, сәл де болса турнирлік кестедегі жағдайын жақсартты.
"Барыс" келесі кездесуін 30 қыркүйек күні өз айдынында новосібірлік "Сібір" командасына қарсы өткізеді.
