DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 311,62 Brent 36,55
Батыр Жүкембаев қарсыласын бірінші раундта сұлатты

Батыр Жүкембаев қарсыласын бірінші раундта сұлатты

Кәсіпқой бокстағы қазақтың күрзі жұдырықты жігіттерінің бірі бүгін 16 – шы жеңісіне қол жеткізді.

18 Мамыр 2019 13:26 1602

Батыр Жүкембаев қарсыласын бірінші раундта сұлатты

Автор:

Маруан Түсіп

Фото: eottm.com

Бірінші жартылай салмақта өнер көрсететін Батыр Жүкембаев (16-0, 13 KO) бүгін Канаданың Монреаль қаласында тағы да жеңіске жетті. Мексика жігіті Луис Хесус Видалеспен (14-7, 6 KO)  жұдырықтасып, өте ширақ қимылдап, бірінші раундтың соңғы секундында қарсыласын есінен тандырды. Техникалық нокаут.

Он раундқа жоспарланған жекпе-жек аса жоғары қарқында басталған жоқ. Екі боксшы бір-бірін аңдып, соққы жұмсауға қолайлы сәт күтіп жүрді. Бірақ Батыр батыл қимылдап, бірнеше соққысын діттеген жеріне дөп тигізе білді. Бірінші раунд аяқталуға айналғанда, бетінен  шірене тартып жіберіп еді, Луис Хесус Видалес тәлтіректеп, арқанға сүйеніп барып құлады. Арқан болмағанда, мұрттай ұшар ма еді? Нокдаун! Төреші есеп ашып, санай бастаған. Мексика боксшысы жекпе-жекті жалғастырғысы келетін сыңай  танытпады. Сондықтан төрешінің жекпе-жекті тоқтатқаннан басқа амалы болмады.

Сол кезде ғана Луис Хесус екі қолымен «мұныңыз қалай» деген ишара білдіріп, наразы болған кейіп танытқансыды. Бірақ бұл «ұялған тек тұрмастың» кері ғана сияқты еді. Ол үш минуттың ішінде-ақ Батырдың қуатты соққысының «дәмін татып» көріп, одан әрі таяқ жеуге құлықты болмады.

28 жастағы Батыр Жүкембаев болса, Канадада қарсылас шақ келтірмей жүр. 2015 жылдан бері «Үйеңкі жапырақтылар» елінде үстемдік танытып келеді. Енді үлкен жоспарлары бар көрінеді. Бұйыртса Golden Boy промоутерлік компаниясымен келісімшартқа отырады екен. Өздеріңіз білесіздер, бұл компанияның дәл қазіргі ең танымал боксшысы – Сауль Альварес Канело (52-1-2, 35 КО).

Маруан Түсіп

inbusiness.kz-ті қараңыз, оқыңыз :

Қырқында қамал алар еді...

Олимпиада чемпионы Бекзат Саттарханов бүгін, 4-сәуір 40 жасқа толар еді...

04 Сәуір 2020 03:12 1736

Қырқында қамал алар еді...

Спортта жасындай жарқылдады деп айтып жатамыз ғой. Иә, осы сөзді тура Бекзаттың спорттағы қысқа ғұмырына арнап айтса болардай. Жасындай жарқ етті де, жоқ болды. 20 жасында Олимпиада чемпионы атанып, қазақ спортының көгіне бір-ақ шығып еді. Бүкіл дүние жүзінің кіл мықтылары келген Сидней Олимппиадасында Бекзат Саттарханов 57 келі салмақ дәрежесінде қарсыласының барлығын жеңіп шықты. 

Елге келе салысымен, әуежайда табаны жерге тиісімен, "Елдің намысы үшін, ауылдағы ағайынның абыройы үшін бокстастым" деп ағынан жарылды. Бокс өнерін ұлттық спортындай көріп кеткен қазақ жанкүйеріне Бекзат болашағы жарқын былғары қолғап шебері болып елестеді. "Әлі екі Олимпиаданы бағындырады", "келесі жылы Әлем чемпионы болады", "қазақтан шыққан тұңғыш екі дүркін Олимпиада чемпионы болуы тиіс" деген ойлар айтылып жүрді. Мемлекеттік орындардан марапаттарын алып болған соң, ауылдағы ағайын Бекзаттың аяғын жерге тигізбеді. Үстіне шапан жауып, астына ат мінгізді. 2000 жылы туған көптеген нәрестеге еліміздің әр түпкірінде Бекзат деген есім беріліп жатты. Сол тұста Саттархановтан асқан сері, Бекзаттан асқан бақытты адам жоқ еді. 

Алайда, жас талант чемпиондығының қадір-қасиетін көп сезе алмады да. 2000 жылдың 31-желтоқсан күні жол апатынан мерт болды. Қазақ спорты ғана емес, жалпы жұрт қайғыдан қара жамылды. "Көре алмайтындар қастандық жасады", "Қазақтың маңдайына сыймай кетті", "Асыра мақтап, адамды есінен адастырды" деген сыңайда сөз тарады. Әлі талай жарыста Қазақстан көк туын желбірететін Бекзаттан бір күнде айырылып қалдық. Жазмыштан озмыш жоқ. 

Дегенімен, бір Олимпиаданың өзінде ол күллі жанкүйер көңілін жаулап үлгерді. Қатысқан жарыстарының біршамасында "доданың үздік боксшысы" атағын алатын. Мәскеуде өткен ТМД елдерінің кубогы жарысында "Үздік боксшы" номинациясын жеңді. Жеңіл қимылдап, ауыр соққы жасап, бокстың бар мәнерін нақышына келтіретін. Талант десе талант болатын. Осындай алтын ұлдан айырылған әке-шешенің де ішінде не дүлей жатқанын кім білсін? Осы жақында ғана әкесі Сейілхан ағамыз да дүниеден өтті. Егер Бекзат арамызда болғанда бүгін 40 жасқа толар еді-ау. 

Ермұхамед Мәулен

Головкин - Шеремета кездесуі Қазақстанда өте ме?

Қазақстандық боксшы Геннадий Головкиннің промоутері Эдди Хирн орта салмақтағы Әлем чемпионының келесі жекпе-жегі туған жерінде өтуі мүмкін екенін тағы да айтты.

13 Ақпан 2020 16:44 1198

Головкин - Шеремета кездесуі Қазақстанда өте ме?

Бұған дейін де Эдди Хирн биылғы жылдың сәуір айында өтетін Геннадий Головкиннің жекпе-жегін Қазақстанда өтуі мүмкін деп хабарлаған болатын. Естеріңізге сала кетсек, келесі жекпе-жекте Головкин поляк боксшысы Камил Шереметаға қарсы IBF/IBO атағын қорғап қалу үшін өткізеді. Негізінде бұл жекпе-жек поляк диаспорасының басым көпшілігі тұратын Чикагода өтеді деп хабарланған. Кейіннен GGG промоутері мен DAZN платформасының серіктесі Хирн бокс кеші Қазақстанда өтуі мүмкін деді. Осы ақпараттан кейін көптеген сарапшылар мұндай маңызды жарыстың Қазақстанда өтетініне және лайықты аудитория жинай алатынына күмәнмен қарады.

RingPolska басылымы Головкин мен Шеремета арасындағы теке тірестің ұйымдастырылуына қатысты жұмыстардың Қазақстанда сәтсіз аяқталғанын, сол себепті АҚШ-та өтуі мүмкіндігі туындады деп хабарлаған еді. Оған қоса жақында Шеремета АҚШ-қа жұмыс бабымен виза жасатып жатқанын да айтқан болатын. Ал енді Matchroom Boxing промоутерлік компаниясының басшысы және Головкиннің промоутері Хирн жекпе-жектің Қазақстанда өтуі мүмкін екені жайлы хабарлады. Оны атақты ESPN телеарнасы растап берді. «Біз бұл мәселені қарасытырып жатырмыз, - деді Хирн спорт арнасына берген сұхбатында. – Қазірше бұл мәселе әлі шешімін тапқан жоқ. Бірақ, Қазақстанда өтуі әбден мүмкін».

Головкин мен Шеремета арасындағы жекпе-жектің өткізілетін уақыты бірнеше мәрте кері шегерілді. Алдымен 29-ақпан деп, кейін басқа кездесулермен қатар келгендіктен ол 28-наурызда өтетін болған. Енді тағы да дәл сондай жағдай орын алып, кездесу сәуір айына жоспарланып отыр.

Головкиннің қарсыласының айтуы бойынша оған бокс кешінің қай жерде өтетіні маңызды емес. «Жекпе жек 11-сәуір күні өтеді деп жатыр. Әрине, жарыстың қай күні өтетіні маңызды. Ал қай жерде өтетіні маңызды емес. Мен Головкинмен айда болса да жекпе-жекке шығуға дайынмын. Бастысы, жұдырықтасудың өтетін күнін ертерек білгім келеді. Себебі дайындық жұмыстарын бастауым қажет», - деді Шеремета.

Егер осы жолы Головкиннің кездесуі Қазақстанда өтсе, бұл оның туған елінде өткізген екінші шоуы болмақ. Естеріңізге сала кетсек, Головкиннің Қазақстандағы алғашқы жекпе-жегі елордадағы «Дәулет» спорт сарайында 2010 жылы 16 желтоқсанда өткен. Ол кездесуде GGG колумбиялық Нельсон Хулио Тапияны нокаутқа жіберіп, орта салмақ бойынша WBA титулын қорғап қалған еді.

Ермұхамед Мәулен

inbusiness.kz-ті қараңыз, оқыңыз :

Жаңалықтарға жазылу: