Қазақстан әйелдер хоккей құрамасының және "Айсұлу" клубының шабуылшысы Малика Алдабергенова мәнерлеп сырғанаушы Михаил Шайдоров көтерген мәселеден кейін өз командасындағы жалақы төлеу жағдайына қатысты мәлімдеме жасады, деп жазады inbusiness.kz сайты 1bol.kz спорт порталына сілтеме жасап.
"Көпшілік Михаил Шайдоровтың жағдайынан хабардар шығар. Кейбіреулер мен оның танымалдылығын пайдаланып, өз мәселеме назар аудартқым келеді деп ойлауы мүмкін. Бірақ шын мәнінде бізді басқа жағдайда ешкім естімейді. Бесінші ай қатарынан жалақымыз төленбей келеді.
Әр ай сайын жаңа мерзім айтылады: алдымен бір күнді белгілейді, кейін оны ауыстырады, одан соң айдың соңына дейін күтуді сұрайды. Бұл жағдай қайта-қайта қайталануда", – деп жазды Алдабергенова Threads әлеуметтік желісінде.
Хоккейшінің бұл мәлімдемесі соңғы күндері қазақстандық спорттағы қаржыландыру мәселелері төңірегінде өрбіген талқылаудың жалғасына айналды.
Өткен аптада мәнерлеп сырғанаушы Михаил Шайдоров та бірнеше ай бойы тиесілі төлемдерін ала алмай жүргенін мәлімдеген болатын.
2026 жылдың сәуір айында Қазақстан әйелдер құрамасы хоккейден әлем чемпионатының IB дивизионында қола медаль жеңіп алды.
