Қазақстандық жұп Франция ашық чемпионатының ширек финалында монаколық Хьюго Нис - германиялық Тим Пюцпен күш сынасты. Бублик пен Голубев матчты бірден брейкпен бастады – 2:0. Тағы бір брейкпен есепті 5:2-ге жеткізді. Бұдан кейін монаколық-германиялық жұп есепті қысқартқанымен, сет қазақстандықтардың еншісінде кетті – 6:4.
Жерлестеріміз екінші сетте де 2:0 есебімен алға шықты. Ақыры осы басымдылықты сақтап, кездесуді сәтті аяқтады – 6:4. Бәсеке 1 сағат 16 минутқа созылды. Голубев пен Бублик дуэті финалға шығу үшін испаниялықтар Пабло Андухар – Педро Мартинес жұбымен таласады.
Сонымен қатар Қазақстанның бірінші, әлемнің 22-ракеткасы Елена Рыбакина жұптық сында Ролан Гаррос турнирінің ширек финалына шықты.
Елена Рыбакина ресейлік Анастасия Павлюченковамен бірге үшінші айналымда осы Франция ашық чемпионатының 3-ракеткалары, америкалық Николь Меличар – нидерландылық Деми Схюрспен күш сынасты. Бірінші партия барысында америкалық-жұп 4:3 есебімен алға кеткенімен, бұдан кейін Рыбакина мен Павлюченкова брейк жасап, таразы басын теңестірді. Сосын сетті тағы бір брейкпен түйіндеді – 6:4.
Екінші сетте есеп 3:2 болған мезетте қазақстандық-ресейлік жұп брейк жасай алды – 4:2. Ақыры Елена Рыбакина матчқа допты жақсы берді – 6:3. Бәсеке 1 сағат 20 минутқа созылды. Қазақстандық-ресейлік жұп жартылай финалға өту үшін Польша өкілі Магда Линетт – америкалық Бернарда Перамен шеберлік байқасады.
Бүгін Рыбакина мен Павлюченкова жекелей сында "Ролан Гаррос" турнирінің жартылай финалына шығу үшін таласатын болады. Кездесу Нұр-Сұлтан уақытымен 17:15-те басталады. Айта кетейік, жекелей сында соңғы матчта Елена атақты Серена Уильямсты жеңіп, сенсация жасаған еді.
Ермұхамед Мәулен
