Александр Бублик жүлде қоры 770 мың еуроны құрайтын Штутгарт (Германия) ATP 250 додасында, жекелей сында алғашқы кездесуін америкалық Денис Кудламен өткізді. Қазақстандық спортшы 7:6 (7:3), 7:5 есебімен ұтты. Ол 12 эйспен бірге 7 брейк-пойнттың екеуін мүлт жіберген жоқ. Александр ертенң екінші айналымда "Үлкен дулыға" турнирінің үш дүркін чемпионы, әлемнің экс-бірінші ракеткасы ұлыбританиялық Энди Марреймен күш сынасады. Теннисшілер биыл өзара екі рет кездесіп, бір-бірден жеңіске жеткен еді.
Елена Рыбакина Нидерландының Хертогенбос қаласында өтіп жатқан WTA 250 турнирінің алғашқы айналымында америкалық Джейми Лобпен сынға түсті. Қазақстандық теннисші қарсыласын 6:4, 7:5 есебімен жеңді. Елена 10 эйс жасап, 10 брейк-пойнттың екеуін пайдалана білді. Ал ертең еліміздің бірінші ракеткасы 1/8 финал аясында Шелби Роджерспен кездесетін болды. Сондай-ақ отандасымыз жұптық сайыста да өнер көрсетуде. Ол Людмила Самсоновамен бірге бүгін елорда уақытымен 19:00-де Т. Зиданшек/Э. Перес жұбынына қарсы өнер көрсетеді.
ATP рейтингінде 166-орында тұрған қазақстандық теннисші Михаил Кукушкин Ноттингемде (Ұлыбритания) өткен жекелей турнирде алғашқы кездесуін өткізді. Ол румыниялық Мариуш Копилмен кездесіп, екі сетте 6:4, 6:4 есебімен жеңіске жетті. Кездесу бір сағат 18 минутқа созылды. Айта кетейік, бұл матч турнирдің 1/16 финалы кезеңінде өтті.
Дмитрий Попко Словакия астанасы Братиславада өтіп жатқан турнирде жекелей сында алғашқы кездесуін жеңіспен бастады. Екі сағатқа созылған 1/16 финалдық матчта қазақстандық Украинадан келген Олег Приходькодан үш сетте 4:6, 6:1, 6:2 есебімен басым түсті.
Айта кетейік, осылайша қазақстандық теннисші жарыстың 1/8 финалына жолдама алды.
Ермұхамед Мәулен
