DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 311,62 Brent 36,55
Чемпиондар лигасының финалына чемпион емес командалар шықты

Чемпиондар лигасының финалына чемпион емес командалар шықты

UEFA Чемпиондары лигасының жартылай финалдық ойындары аяқталып, бас бәйгені ағылшын клубтары сарапқа салатын болды.

09 Мамыр 2019 13:08 1550

Чемпиондар лигасының финалына чемпион емес командалар шықты

Автор:

Маруан Түсіп

Фото: uefa.com

Чемпиондар лигасының екінші жартылай финалында «Аякс» пен «Тоттенхэм» додаға түскен болатын. Бұған дейін «Реал» (Мадрид) және «Ювентус» (Турин) секілді азул командаларды жолынан тайдырған Нидерланд клубы түзде өткен бірінші ойында 1:0 есебімен жеңіске жеткен-ді. Енді өз алаңында тең түссе де, жарайтын еді.

Обалы нешік, «Аякс» бірінші таймда жанкештілік танытып, екі гол соқты да. ЧЛ финалының жолдамасы қол созым жерде тұрғандай еді. Бірақ, бірақ... Екінші таймда қонақтар түлеп сала берді. Үш гол соғып, «Йохан Кройф Арена» стадионын сілтідей тындырды. Жалпы есеп 3:3 болғанымен, ағылшын клубының түзде соққан голдары артық болып, финалға шықты.

Иә, өз алаңындағы және түздегі екі матчтың үш таймында (135 минут бойы) бірде-бір гол соға алмаған «Тоттенхэм» соңғы таймда, нақтырақ айтқанда, оның соңғы 35 минутында үш гол соқты. Үшінші голды төреші матчтың негізгі уақытына қосқан қосымша бес минут та түгесіліп, алтыншысы басталғанда салды.  

Не сиқыры бар екенін, ағылшын клубы осылай төрткіл дүниені таң қалдырды. Үш голды да «Тоттенхэм» сапындағы Бразилия құрамасының жартылай қорғаушысы Лукас Моура салды. Өзектері өртенген «Аякстің» жанкешті жас таланттары жасыл алаң үстіне жата кетіп, көз жастарына да ерік берді. Амстердам жанкүйерлері аһ ұрды. 

Сөйтіп, Чемпиондар лигасының биылғы финалына ағылшынның екі клубы шықты. Олар – былтыр Англия премьер-лигасында 3-орын алған «Тоттенхэм» мен 4-орынға ие болған «Ливерпуль». Осы ретте айта кетейік, АПЛ-дың биылғы додасының соңғы туры 12 мамыр күні өтеді. «Ливерпульдің» алтыннан, ал «Тоттенхэм» қола жүлдеден үміті бар. 

Ал UEFA Чемпиондар лигасының финалы 1 маусым күні Мадридте өтеді. Бас бәйгені ағылшынның екі клубы сарапқа салатынын жаздық. Иә, бұл – ағылшын премьер-лигасының 39-туры емес, финал. Жартылай финалда «Барселона» мен «Аяксті» жолдарынан тайдырған Англия клубтары шешуші матчта да адам таң қаларлық ойын үлгісін көрсетеді деп ойлаймыз.

Айтпақшы, бүгін Еуропа лигасының жартылай финалдық ойындарының қарымта матчтары өтеді. Мұнда да Англияның екі клубы бар. Олар да финалға шықса, қызықтың көкесі сонда болар еді! Енді, «Валенсия» (Испания) – «Арсенал» (Англия) және «Челси» (Англия) – «Айнтрахт» (Германия) матчтарын асыға күтеміз...

Чемпиондар лигасы. Жартылай финал. Қарымта матч

«Аякс» – «Тоттенхэм» – 2:3 (бірінші ойын – 1:0)

Голдар: де Лигт, 5 (1:0). Зиеш, 35 (2:0). Лукас Моура, 55 (2:1). Лукас Моура, 59 (2:2). Лукас Моура, 90+6 (2:3).

Маруан Түсіп

inbusiness.kz-ті қараңыз, оқыңыз :

Чемпиондар лигасында «Ливерпуль» топ жарды

Ағылшын клубы Еуропаның мәртебесі бәрінен жоғары лигасын алтыншы рет жеңіп алды.

02 Маусым 2019 10:40 1626

Чемпиондар лигасында «Ливерпуль» топ жарды

Фото: UEFA.com

Биыл UEFA Чемпиондар лигасының финалына ағылшынның екі клубы шыққан болатын. Атап айтқанда, бас бәйгені Мадридте, яғни бейтарап алаңда, «Ливерпуль» мен «Тоттенхэм» сарапқа салды. Ойын басталған бетте, нақтырақ айтқанда, 24 секундта төреші пенальти беріп, бүкіл әлемді қайран қалдырды.

Доп «Тоттенхэм» қорғаушысының қолына ма, иығына ма тиіп, бас қазы Дамир Скомина 11метрлік айып соққысы нүктесін нұсқады. Ал Мохамед Салах пенальтиді мүлтіксіз орындап, есеп ашты. Содан кейін «Ливерпуль» қорғанысқа көңіл бөліп, қарсы шабуыл ұйымдастырып отыруға көшті. Бірінші тайм осылай аяқталды.

«Тоттенхэм» екінші таймда да шабуылдап, жылдам ойнауға тырысты. Бірақ «Ливерпуль» клубының қорғанысын бұзып өте алмады. Қалай десек те, Алиссонның қақпасына айтарлықтай қауіп бұлтын төндіре алмады. Ал матч соңында қызыл жейделілер тағы бір гол соғып, қарсыласының сағын сындырды.

«Ливерпуль» сапынан екінші голды алты күннен кейін, Қазақстан ұлттық құрамасымен кездесетін Бельгия құрамасының шабуылшысы Дивок Ориги соқты. Ол бұл матчта негізгі құрамда шыққан жоқ болатын. Әйтсе де, 58-минутта Фирминоның орнына шығып, топсасы берік француз қақпашысы Уго Льористің өзін қапы қалдырды.

Өкінішке қарай, бұл ойында «Тоттенхэм» футболшылары мен осы команданың білікті бапкері Маурисио Почеттиноға тағы бір ерлік жасап, әлем жұртын таң қалдырудың сәті түспеді. Ал «Ливерпуль» 14 жылдан кейін Чемпиондар лигасын алтыншы рет жеңіп алды (1977, 1978, 1981, 1984, 2005, 2019). Бұл ретте олардан тек «Реал» (13) және «Милан» (7) клубтары асып тұр.  

«Ливерпуль» (Англия) – «Тоттенхэм» (Англия) – 2:0

Голдар: Салах, 2-пенальтиден. Ориги, 87.

Маруан Түсіп

«Энфилдтегі» ертегі – «Барселона» етпетінен түсті

UEFA Чемпиондары лигасының жартылай финалында «Ливерпуль» жауапсыз төрт гол соғып, финалға шықты.

08 Мамыр 2019 07:39 815

«Энфилдтегі» ертегі – «Барселона» етпетінен түсті

Чемпиондар лигасының жартылай финалында «Ливерпуль» мен «Барселона» арасында қарымта матч өтіп, ағылшын клубы өздеріне қажетті ірі есеппен жеңіске жетті. Осыдан алты күн бұрын «Камп Ноу» стадионында 0:3 есебімен ұтылып қалғанымен, бүгін түнде «Энфилдте» 4:0 есебімен есесін еселеп қайтарды.

Бір қызығы, бұл ойында жасыл алаңға ағылшын клубының екі бірдей белді ойыншысы шыға алмады. Мысырлық Мохамед Салах пен бразилиялық Роберто Фирмино жарақатанып қалып, бұл ойында көрермендер санын көбейтті. Әйтсе де «Битлздің» жерлестері сапынан «Барселонаның» топсасы берік қақпасына гол соғатын жігіттер табылды.

Жалпы «Ливерпуль» аянған жоқ. Матч басталған бетте алға қарай лап қойды. Бірінші таймның басында тамырында Кения қаны соққан, Бельгия құрамасының шабуылшысы Дивок Ориги есеп ашты. «Энфилд» стадионына жиналған 55 мыңнан астам жанкүйер дүр сілкінді. Әрі Юрген Клопптың шәкірттерін қамшылай түсті.

«Барселона» ойыншылары допты ары-бері қақпақылдап, қақпасыз ойын өрнегін көрсетуден аспады. Бірінші таймның басында 3-4 ойыншысы бірдей «Ливерпульдің» қақпашысымен бетпе-бет шықса да, барлығы бірдей аңтарылып, жалғыз қақпашыға гол соға алмады. Алты күннің ішінде бар білгендерінен жаңылып қалғандай.

Ал «Ливерпуль» екінші таймда құйындай орап соқты. Алаңға ойынның екінші жартысында ғана шыққан, голланд футболшысы Джорджинио Вейналдум айналасы бір жарым минуттың ішінде екі доп салды. Әуелі Александер-Арнолдтың оң қанаттан берген пасын екпінімен келіп теуіп, қақпа торын бүлк еткізді.

Іле-шала Шакиридің сол қанаттан әуелете асырған добын бәрінен биік секіріп, тіпті ауада бірер сәт қалықтап тұра қалды да, басымен қақпаға дөп түсірді.

Ал төртінші гол... Чемпиондар лигасында ойнайтын, деңгейі жоғары команда жіберетін доп емес. Доп ойынға бұрыштан қосылғанда «Барселона» ойыншылары «ұйықтап» тұрды.

Иә, қонақтар жайбарақат тұрғанда, кім қай жерде тұруы керек екенін өзара шешіп алмақ болғанда, Александер-Арнолд тез қимылдап, допты Оригиге ысыра қойды. Қақпа алдында жападан жалғыз қалған шабуылшы мүлт кеткен жоқ. Гол! Есеп – 4:0. «Энфилд» теңселіп кетті. Юрген Клопп қуанғанынан аспанға секірді.

Сөйтіп «Ливерпуль» ерлік жасап, финалға шықты. Ал «Барселона» үшінші жыл қатарынан жанкүйерлерін жерге қаратып, жігерлерін құм қылды. 2017 жылы ПСЖ клубынан 0:4 есебімен ұтылып, қарымта матчта 6:1 есебімен жеңіп, бүкіл әлемді таң қалдырған. Бірақ ширек финалда «Ювентусқа» жол берген (0:0 және 0:3).

Былтыр «Рома» клубын өз алаңында 4:1 есебімен үстем түсіп, түзде 0:3 есебімен ойсырай ұтылған. Жалпы есеп 4:4 болса да, қарсыласы түзде соққан добының арқасында жартылай финалға шыққан. Ал биылғысы – мынау. «Ливерпуль» жігіттерінен 0:4 есебімен күйрей ұтылып отыр.

Чемпиондар лигасы. Жартылай финал. Қарымта матч

«Ливерпуль» – «Барселона» – 4:0 (бірінші ойын – 0:3)

Голдар: Ориги, 7. Вейналдум, 54. Вейналдум, 56. Ориги, 79.

Маруан Түсіп

inbusiness.kz-ті қараңыз, оқыңыз :

Жаңалықтарға жазылу: