ЦСКА футбол клубы "Ростов" командасы мен Қазақстан ұлттық құрамасының жартылай қорғаушысы Бахтиёр Зайнутдиновті сатып алу туралы келіссөздер жүргізуде, - деп хабарлайды Чемпионат сайты. Тараптар келісімге келуге жақын қалды.
Ресей чемпионатының соңғы маусымында Зайнутдинов "Ростов" үшін 17 матч өткізіп, 4 гол соғып, 3 нәтижелі пас шығарды.
Сонымен қатар Ресей премьер-лигасының 4-тур ойындарында Зайнутдинов та алаңға шықты. Кездесу бүгін, 23-тамыз "Ростов" пен "Уфа" командалары арасында өтті. Ойында қазақстандық футболшы бүгін де нәтижелі пас шығарып, оны "Ростовтың" жапониялық жартылай қорғаушысы Кенто Хасимото голға айналдырды. Нәтижесінде Бахтиёрдің командасы жеңіске жетті.
Ресей премьер-лигасының жаңа маусымында ол 3 ойынға қатысып, 2 сары қағаз алды. Жартылай қорғаушының "Ростовпен" келісім-шарты 2020-жылдың желтоқсан айына дейін жарамды. Енді мәскеулік клуб ойыншының келісім-шартын сатып алмақшы. ЦСКА "Ростовқа" Қазақстан ұлттық құрамасының 22 жастағы жартылай қорғаушысы Бахтиёр Зайнутдинов үшін келісім-шартта қарастырылған өтемақыны төлейді. Сондай-ақ Зайнутдиновтың трансферлік құны 2 миллион еуроға бағаланып отыр.
"Келіссөздер мен келісімдер қажет емес. Зайнутдиновтың келісім-шартында өтемақысы бар және ЦСКА оны төлеп, Бахтиёрді өз қатарына қоса алады. Тек ойыншының жағдайы маңызды. Гончаренко футболшыны көргісі келеді. Бірақ, Гончаренконың өзі осы командада қанша уақыт жұмыс істейтіні туралы сұрақ туындайды", - деп жазады журналист Сергей Егоров. ⠀
Естеріңізге сала кетсек, Бахтиёр Зайнутдинов "Ростовқа" 2019-жылдың қаңтарында елордалық "Астана" футбол клубынан 115 мың еуроға ауысып келген болатын.
Ермұхамед Мәулен
