Олимпиада чемпионы Данияр Елеусінов (12-0, 7 КО) жартылай орта салмақта (66,7 келіге дейін) WBC чемпионы америкалық Марио Барриосты (29-2-1, 18 КО) жұдырықтасуға шақырды, деп хабарлайды inbusiness.kz сайты.
"Өткен демалыста WBC нұсқасы бойынша әлем чемпионы Марио Барриостың әлсіз өнерін көрдім. Абель Рамоспен тең түсті, сонымен қатар, ол жекпе-жектің ортасында нокдаун алды.
Марио, мен сені жеңіп шығатыныма сенімдімін. Кел, жұдырықтасайық. Қай жерде болса да, кез келген уақытта. Олимпиада чемпионы мен WBC чемпионы. Кел, жанкүйерлерімізге нағыз шоу көрсетейік!", – деп жазды Елеусінов Instagram парақшасында.
Айта кетейік, Данияр Елеусінов қыркүйек айында Алматыда жекпе-жекке шықты. Филиппиндік Джо Нойнайды (23-5-2, 11 КО) бесінші раундта уақытынан бұрын жеңіп шықты. Бұл жеңіс Елеусиновқа WBC Peace нұсқасы бойынша екінші дәрежелі чемпион атағын иеленуге және BoxRec рейтингінің ТОП-15-тігіне енуге мүмкіндік берді.
