Алматылық “Қайрат” Қазақстан премьер-лигасының сегізінші турының кейінге шегерілген ойынында елордалық “Жеңісті” тізе бүктірді. Алматыда өткен матч алаң иелерінің пайдасына 3:1 есебімен аяқталды.
Ойынның 12-минутында Дастан Сәтпаев есеп ашты.
37-минутта Сәтпаев есепті 2:0-ге жеткізді. Екінші таймның басында, 52-минутта “Жеңіс” капитаны Исламбек Қуат бір гол соғып, есеп айырмасын қысқартты – 2:1.
Дегенмен, “Қайратқа” үшінші гол соғуға мүмкіндік туды. 80-минутта Рикардиньо Александр Мрынскийдің пасын голға айналдырып, ойынның нүктесін қойды.
Осылайша, “Қайрат” 52 ұпаймен 50 ұпайы бар “Астананы” артқа тастап, турнирлік кестенің көшін қайта бастады.
“Жеңістің” еншісінде – 31 ұпай бар.
Айта кетейік, “Қайраттың” шабуылшысы Дастан Сәтпаев елордалық “Жеңіспен” өткен ойында соққан екі голынан кейін ҚПЛ-дағы (2025ж) голдар санын 11-ге жеткізді.
Осы нәтижеден кейін ол “Астана” ойыншысы, хорватиялық Марин Томасовты қуып жетіп, бомбардирлер тізімінде көш басына шықты.
