Бүгін клуб кеңсесінде клубтың жаңа атқарушы директорын таныстырды. Ол қызметке Давид Лория тағайындалды, - деп хабарлайды "Астана" футбол клубының баспасөз қызметі.
Давид Григорьевич – елордалық футбол мектебінің түлегі және Қазақстан құрамасының рекордсмендерінің бірі. Лория футболшы мансабында "Жеңіс", "Есіл", "Шахтер", "Ертіс", "Қайрат", "Ордабасы" және "Локомотив" клубтарының намысын қорғап, 2009 жылы астаналық ұжым сапында командамен күміс медальді жеңіп алды. Ол сондай-ақ түріктің "Ризеспор", "Каршияка", швециялық "Халмстад" және ресейлік "Спартак Нальчик" клубтарының намысын қорғаған.
Экс-қақпашының еншісінде жалпы саны үш чемпиондық титул бар. Лория Қазақстан жастар құрамасы сапында Нигерияда өткен Әлем чемпионатына қатысып, ұлттық құрама сапында 45 ойын өткізді. Давид 2019 жылы футболдағы мансабын аяқтаған соң құрама командалардың бұрынғы ойыншылары үшін құрылған UEFA MIP футбол менеджменті бағдарламасы бойынша курстарға түсті.
Естеріңізге сала кетейік, бірнеше күн бұрын "Астана" Пол Эшуортты қызметінен босатқан еді. Давид Лория атқарушы директор болып тағайындалғанымен, әлі бас бапкер табылған жоқ. Дегенмен бапкерлікке үміткерлер тізімінде Вячеслав Грозный, Виктор Кумыков, Владимир Чебурин сияқты бапкерлер де бар. Бірақ "Астана" әлі де болса жаңа бапкер іздестіру үстінде.
Ермұхамед Мәулен
