Жоба Мəдениет жəне спорт министрлігі, Алматы қаласының Мəдениетжəне спорт басқармасы мен спортшының анасы Оксана Тенмен бірлесіп жүзеге асырылып жатыр.
Global Figure Skating академиясы - кезінде Денис Теннің еліміздегі мəнерлеп сырғанау спортының деңгейін зерттей келе, жеке тəжірибесіне сүйене отырып, дайындалған жоба болатын. Академия Алматы қаласындағы мұз сарайының бірінің жанынан ашылады.
Денис Тен атындағы Global Figure Skating мəнерлеп сырғанау академиясы Қазақстанда мəнерлеп сырғанау спортын дамытуға бағытталған бірыңғай орталық болады. Академия балалар арасында аталған спорт түрін бұқаралық деңгейге жеткізуге бағытталады. Қазір Оксана Тен Global Figure Skating академиясында балаларды баулу үшін Денисті жаттықтырған Татьяна Тарасова, Фрэнк Кэролл сынды даңқты бапкерлермен келіссөз жүргізіп жатыр.
Мəдениет жəне спорт министрлігі аталған академияның ашылуы елімізде мəнерлеп сырғанау спортының дамуына серпін береді деп жоспарлап отыр. Ал Алматы қаласында мемлекеттік жəне жеке секцияларда 5 000-нан астам бала мəнерлеп сырғанаумен тұрақты шұғылданады. Академия ашылған соң, балалар бір орталықта дайындалады. Жуық арада жоба концепциясы мен қаржы көзі туралы ақпарат белгілі болады. Алдағы уақытта осындай академияны Нұр-Сұлтан қаласынан ашу жоспарда бар.
Қазір еліміздің 13 өңірінде (Ақтөбе, Алматы, Атырау, БҚО, ШҚО, Қарағанды Қостанай, Қызылорда, Маңғыстау, Павлодар облысы мен Алматы, Нұр-Сұлтан, Шымкент қалалары) мəнерлеп сырғанау секциясы жұмыс істейді.
Тəуелсіздік алғаннан бері мəнерлеп сырғанаудан спортшыларымыз қол жеткізген жүлделер: Олимпиада - Денис Тен, қола (2014). Əлем чемпионаты – Денис Тен, күміс (2013), қола (2015) жəне Элизабет Тұрсынбаева - күміс (2019).
Азия ойындары - Денис Тен алтын (2011), Элизабет Тұрсынбаева - қола (2017),Марина Халтурина мен Андрей Крюков жұбы күміс (1996 жəне 1999), Елизавета Стекольникова мен Дмитрий Казарлыга жұбы алтын (1996).
Бүкіләлемдік универсиада - Жансая Адыханова мен Əбіш Байтқанов жұбы қола (2019), Денис Тен алтын (2017), Элизабет Тұрсынбаева күміс (2019), Марина Халтурина мен Андрей Крюков жұбы алтын (1995), Елизавета Стекольникова мен Дмитрий Казарлыга жұбы қола (1995) медльдар иемденді.
Ермұхамед Мәулен
