Қазақстандық мәнерлеп сырғанаушы Диас Жиренбаев Чехияның Прага қаласында өтіп жатқан мәнерлеп сырғанаудан әлем чемпионатына қатысуда. Отандасымыз ерлер арасындағы жекелей қысқа бағдарламада 59,34 ұпай жинады.
Қысқа бағдарламада жалпы саны 36 мәнерлеп сырғанаушы айдынға шығады. Олардың қатарында 2026 жылғы Олимпиада ойындарының жүлдегерлері жапониялық Юма Кагияма мен Шун Сато, командалық турнирде 2026 жылғы Олимпиада чемпионы және екі дүркін әлем чемпионы америкалық Илья Малинин, сондай-ақ әлем чемпионатының қола жүлдегері француз Адам Сяо Хим Фа бар.
Қысқа бағдарлама қорытындысы бойынша спортшының әрі қарайғы нәтижесі анықталады. Еркін бағдарламаға жолдама алу үшін қатысушылар үздік 24 спортшының қатарына енуі қажет. Еркін бағдарлама 28 наурызға жоспарланған.
Айта кетейік, аталған әлем чемпионатына 2026 жылғы қысқы Олимпиада чемпионы Михаил Шайдоров қатысқан жоқ.
