Бүгін, 23 ақпанда Сауд Арабиясының Эр-Рияд қаласында ресейлік боксшылар Артур Бетербиев пен Дмитрий Бивол арасындағы жартылай ауыр салмақтағы абсолютті әлем чемпионы атағы үшін реванш өтті. Жекпе-жек 12 раундқа созылып, төрешілер шешімімен Биволдың жеңісімен аяқталды. Қорытынды есеп 114-114, 116-112, 115-113.
Алғашқы раундтардан-ақ Бивол сенімді түрде өнер көрсетті. Алайда жекпе-жектің ортасына қарай Бетербиев басымдықты қолға алып, қарсыласына бірнеше ауыр соққы жасады. Соңғы раундтарда екі боксшы да белсенді түрде соққы алмасты. Бірақ төрешілер жеңісті Биволға берді.
Бұл жеңістен кейін Дмитрий Бивол жартылай ауыр салмақтағы абсолютті әлем чемпионы атанды. Ол WBA, WBC, IBF және WBO титулдарын иеленді. Ал, Артур Бетербиев үшін бұл кәсіби мансабындағы алғашқы жеңілісі болды.
Жекпе-жектен кейін Бивол өз командасы мен жанкүйерлеріне алғысын білдіріп, бұл сәтті ұзақ күткенін атап өтті. Сондай-ақ, ол кез келген боксшымен жұдырықтасуға, оның ішінде Бетербиевпен үшінші жекпе-жекке дайын екенін мәлімдеді. Өз кезегінде Артур Бетербиев қарсыласын жеңісімен құттықтап, бұдан да мықты болып оралғысы келетінін айтып, үшінші кездесу өткізу мүмкіндігін жоққа шығармады.
Айта кетейік, ресейлік боксшылар арасындағы алғашқы жекпе-жек 2024 жылдың қазан айында өтті. Ол уақытта Бетербиев жеңіске жеткен болатын.
Осылайша, бүгінгі жекпе-жек бокс тарихындағы маңызды оқиғаға айналып, жартылай ауыр салмақтағы жаңа абсолютті әлем чемпионы анықталды.
