Биыл әлемдік автомобиль нарығы дағдарыстық жағдайда. Себебі жаһан елдерінде жеңіл автокөліктер сатылымының төмендеуі байқалады, деп хабарлайды inbusiness.kz тілшісі finprom.kz-ке сілтеме жасап.
Мәселен, Еуропалық автомобиль өндірушілер қауымдастығының мәліметтері бойынша, Еуропада жеңіл автокөліктердің сатылымы сәуір айындағы көрсеткіш бойынша бір жыл ішінде 20,2%-ға төмендеп, 830,4 мың автокөлікті құрады. Салыстырар болсақ, 2021 жылдың сәуірінде бұл көрсеткіш 1 млн-нан асқан.
Тікелей Еуропалық одақ (ЕО) елдерінде сату көлемінің төмендеуі 20,6%-ды құрады. Еуропада сектордағы сатылымның ең көп азаюы Литвада (-34,9%), Италияда (-33%), Швейцарияда (-29,1%), Данияда (-29%), Финляндияда (-25,8%) және Австрияда байқалады (−26,6%).
Еуропалық автомобиль өндірушілер қауымдастығының мәліметтері бойынша, теріс динамика жартылай өткізгіштердің (чиптердің) тапшылығына байланысты жаңа автокөліктерді жеткізудегі кідірістерге байланысты. Ал Ресей мен Украинадағы геосаяси дағдарыс салдарынан логистикалық мәселелер күшейген. Бұған қоса, Қытайдағы COVID-19-дың өршуі секторға кері әсер етуде.
Автокөлік компаниялары бойынша Еуропада 2022 жылдың сәуір айында сатылымның күрт төмендеуі Stellantis-те байқалады: көрсеткіш бірден 28%-ға төмендеді. Сонымен қатар Volkswagen Group-тың сатылымы 28%-ға, Jaguar Land Rover Group - 27,7%, Mazda - 27,4%, Volvo - 23%, Mercedes-Benz - 22,6%-ға құлдыраған.
Чиптердің жетіспеушілігіне байланысты Stellantis пен Ford өткен аптада Иллинойс, Кентукки және Онтариодағы зауыттарда өндірісті уақытша тоқтатты. Бұл туралы Foley Automotive компаниясының 2022 жылғы 18 мамырдағы есебінде жазылған.
Дағдарыстан зардап шеккен автокөлік модельдерінің қатарында Jeep Cherokee, Ford Escape, Ford Edge, Lincoln Corsair және Lincoln Nautilus бар. Бұған қоса, өткен аптада Stellantis бөлшектердің жетіспеушілігіне байланысты Виндзордағы (Онтарио) шағын автобус зауытында өндірісті уақытша тоқтатты.
Өз кезегінде, Жапонияда Toyota Қытайдағы COVID-19 салдарынан енгізілген локдаун әсерінен мамыр айында 12 зауытта өндірісті 6 күнге дейін қысқартады, ал жаһандық өндіріс жоспары шамамен 50 000 көлікке азайды. Сонымен қатар Toyota жоғары шикізат шығындары мен жартылай өткізгіштердің үздіксіз тапшылығы компанияның келесі жылдағы кірісін шамамен 20% төмендетуі мүмкін екенін атап өтті.
"Алайда қазіргі экономикалық тұрақсыздық болжам жасауды қиындатып отыр", – деп хабарлады компанияда.
АҚШ-та жаңа жеңіл көліктердің сатылымы бір жыл бұрынғыдан 56,3%-ға, Қытайда – 43,4%-ға, Жапонияда – 14,4%-ға, Оңтүстік Кореяда – 11,8%-ға, Канадада – 8,4%-ға, Мексикада – 1%-ға төмендеді.
Қорыта айтқанда, көлік дағдарысы әлемнің барлық елдерін қамтыды.
Құралай Құдайберген
