Қазақстандық теннисші Елена Рыбакина Токиодағы WTA 500 турнирінде отандасы Юлия Путинцеваны жеңіп, 2026 жылғы маусымды әлемдік рейтингтің көшбасшысы ретінде аяқтайтынын мерзімінен бұрын қамтамасыз етті, деп хабарлайды inbusiness.kz сайты.
Әйелдер теннис қауымдастығының (WTA) есебінше, Рыбакинаға жыл соңында бірінші орында қалу үшін Токиода бір жеңіс жеткілікті болған. Енді қалған турнирлердің нәтижесіне қарамастан, оны рейтингте екінші орында тұрған Арина Соболенко да басып оза алмайды.
Осылайша, 27 жастағы қазақстандық мансабында алғаш рет жылды әлемнің бірінші ракеткасы ретінде аяқтайды. Ол 14 қыркүйекте US Open турнирінде жеңіске жеткеннен кейін рейтинг көшіне шыққан еді. Рыбакина Қазақстан тарихында жекелей сында әлемдік рейтингті басқарған алғашқы теннисші атанды.
Биыл қазақстандық спортшы төрт титул жеңіп алды: Australian Open, Штутгарт, US Open және Нинбо турнирлерінде топ жарды. Нинбодағы жеңіс оның кәсіби мансабындағы 15-ші титулы болды.
Рыбакина маусымды 8-15 қарашада АҚШ-та өтетін WTA қорытынды турнирінде аяқтайды. Ол былтыр жеңіп алған чемпиондық атағын қорғайды. Бұл жарыстың нәтижесі жыл соңындағы әлемдік рейтингтегі бірінші орнына әсер етпейді.
