Қазақстанның бірінші ракеткасы Елена Рыбакина Дубайда өтіп жатқан WTA 1000 санатындағы турнирдің 1/8 финалында хорватиялық теннисші Антония Ружичке қарсы матчты мерзімінен бұрын аяқтауға мәжбүр болды.
Кездесу өте тартысты өтті. Алғашқы партияны Рыбакина 7:5 есебімен өз пайдасына шешті. Алайда екінші сетте Ружич басым түсіп, 6:4 есебімен жеңіске жетті. Шешуші, үшінші сетте қазақстандық спортшы кортта небәрі 11 минут қана ойнап, 0:1 есебімен хорватиялық теннисші алда тұрған сәтте матчты жалғастырудан бас тартты.
Матч барысында Рыбакина физиотерапевтке өзін нашар сезініп тұрғанын айтқан. Ол қатты шаршағанын, жүрегі айнып тұрғанын жеткізді. Сондай-ақ қазақстандық теннисші соңғы күндері ұйқысының бұзылғанын, таңертең "басым ауырлап оянамын" деп шағымданған.
Осылайша, Антония Ружич турнирдің ширек финалына жолдама алды. Ал Елена Рыбакина Дубайдағы жарысты мерзімінен бұрын аяқтады.
