Қазақстанның бірінші ракеткасы Елена Рыбакина (WTA рейтингінде 11-орын) "Ролан Гаррос" турнирінде сенімді ойынын жалғастырып келеді.
Үшінші айналымда отандасымыз латвиялық Елена Остапенконы (21-орын) еш қиындықсыз жеңіп, 6:2, 6:2 есебімен келесі кезеңге өтті.
Бұл матч бар болғаны 1 сағат 15 минутқа созылды. Рыбакина 6 эйс жасап, 4 қос қателік жіберді, сондай-ақ 14 мүмкіндіктің бесеуінде брейк жасап, қарсыласын басымдылықпен тізе бүктірді.
1/8 финалда Рыбакинаға оңай қарсылас бұйырған жоқ. Ол әлемнің бұрынғы бірінші ракеткасы, Польшаның мақтанышы Ига Швёнтекпен (5-орын) кортқа шығады. Швёнтек үшінші айналымда румын қызы Жаклин Кристианды (60-орын) екі сетте жеңіп, 6:2, 7:5 нәтижесімен келесі кезеңге өтті.
Елена мен Ига бұған дейін 11 рет кортта кездескен. Есеп 6:5, Швёнтектің пайдасына. Бұл олардың 12-матчы болмақ және жанкүйерлер алдағы кездесуден нағыз шоу күтуде.
Айта кету керек, биыл Рыбакина "Ролан Гаррос" турнирінде үшінші рет 1/8 финалға жолдама алды. Бұған дейін ол 2021 және 2024 жылдары ширек финалға дейін жеткен. Биылғы маусымда ол кем дегенде осы жетістігін қайталауға ниетті.
