Елена Рыбакина Лондонда өтіп жатқан "Уимблдон" турнирінде жекелей сында үшінші айналымға шықты. Екінші айналымда Қазақстанның бірінші ракеткасы америкалық Клэр Люмен кездесіп, екі сетте бірдей 6: 4 есебімен қарсыласынан басым түсті. Айта кетейік, Рыбакина WTA рейтингінде 20-шы, ал қарсыласы 120-шы орында тұр.
Кездесу 1 сағат 22 минутқа созылды. Осы уақыт аралығында Рыбакина жеті эйс жасап, үш брейк-пойнттың барлығын сәтті орындады және төрт рет қателік жіберді. Қазақстандық теннисшінің келесі қарсыласы Мария Саккари (Греция) - Шелби Роджерс (АҚШ) жұбының жеңімпазы болады.
Ал Зарина Дияс "Уимблдонда" өткен әйелдер арасындағы жекелей сында бірінші айналымда жеңіліп қалды. Қазақстандық теннисшінің қарсыласы Латвия өкілі Анастасия Севастова болды. Бір сағат он минутқа созылған матч 4: 6, 1: 6 есебімен, екі сетте де Диястың жеңілісімен аяқталды.
Тағы бір қазақстандық теннисші Юлия Путинцева бірінші айналымды жеңіспен бастады. Оның қарсыласы Болгария өкілі Цветана Пиронкова болды. Екі сеттеке созылған кездесуде Путинцева мықты болып шықты. Қорытынды есеп, Юлияның пайдасына 6: 3, 6: 1 есебімен аяқталды. Кездесу бір сағат жеті минутқа созылды. Қазақстандық теннисші екі эйс жасап, бір рет қате жіберіп, 12 брейк-пойнттың бесеуін орындады. Юлияның екінші айналымдағы қарсыласы испандықтар Алена Большова - Паула Бадоса Хиберт арасындағы матчтың жеңімпазы болмақ.
Сонымен қатар "Уимблдон" турнирінің алғашқы кезеңінде ерлер арасында ұлттық құраманың теннисшілері Александр Бублик пен Михаил Кукушкин сынға түсті. Бұл екі теннисші арасындағы үшінші кездесу болды. Бұған дейінгі жеке кездесулер 1: 1 есебімен аяқталған болатын.
Қазақстанның бірінші ракеткасы Бублик өзінің ұлттық құрамадағы әріптесіне қарағанда ATP рейтингінде айтарлықтай жоғары, 38-ші орында, ал Кукушкин 105-ші орында тұр. Кездесу 1 сағат 21 минутқа созылды. Нәтижесінде Бублик Кукушкиннен үш сетте 6: 4, 6: 2, 6: 1 есебімен басым түсті. Оның келесі қарсыласы әлемнің 21-ракеткасы болгариялық Григор Димитров болмақ.
Ермұхамед Мәулен
