DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 311,62 Brent 36,55
«Елорда экономикасына 9 трлн теңгеге жуық қаржы салынды»

«Елорда экономикасына 9 трлн теңгеге жуық қаржы салынды»

Нұр-Сұлтан қаласының жалпы ішкі өнімінің 55 пайызы кәсіпкерліктің есебінен қамтамасыз етілуде. 

17 Мамыр 2019 13:26 1486

«Елорда экономикасына 9 трлн теңгеге жуық қаржы салынды»

Автор:

Фархат Әміренов

ХІІ Астана экономикалық форумына қатысқан Нұр-Сұлтан қаласының әкімі Бақыт Сұлтановтың баяндауынша, ел астанасында тұратын әрбір үшінші тұрғын кәсіпкерлікпен айналысады. Ал қаланың жалпы ішкі өнімінің 55 пайызын кәсіпкерлік секторы қамтамасыз етуде. Бюджеттік түсімдердің негізгі бөлігі де осы секторға тиесілі.

«Республиканың жалпы ішкі өнімінің 11 пайызы елордаға тиесілі. Негізгі капиталға салынған инвестицияның 10 пайызы бас қаланың еншісіне тиіп отыр. Жалпы, 20 жылдан аса уақыт ішінде Нұр-Сұлтан қаласының жалпы ішкі өнімі нақты мәнде 6 есе ұлғайып, 17 млрд долларға жетті. Осы жылдар дересінде елорда экономикасына 9 трлн теңгеге жуық қаржы салынды. Жылдық инвестиция көлемі 55 есе өсіп, 3 млрд доллардан астам соманы құрап отыр», – деді жаһандық форумда Бақыт Сұлтанов.

Әкімнің айтуынша, қазір қалалар арасында инвестиция, таланттар, туристер және кәсіпкерлер үшін бәсекелестік жүріп жатыр. Бұл күресте ең жақсы мүмкіндік ұсынғандар ғана жеңіске жетеді.

«Нұр-Сұлтан қаласы да осы үдеден шығуды көздейді. Бәсекеге қабілеттілікті сақтау үшін біз өмір сүрудің жоғары сапасын қамтамасыз етуге тиіспіз. Өйткені адамдар бизнесті қиындықсыз жүргізіп, қауіпсіз әрі жайлы өмір сүретін жерді іздейді. Әр мемлекеттің астанасы оның «визиттік картасы» болып саналады. Нұр-Сұлтан қаласының елордалық мәртебесі де оның мемлекеттегі рөлімен байланысты көптеген міндеттерді шешуді талап етеді. Сондықтан біз әрдайым өңірлік ықпалдастық үшін жемісті іскерлік ынтымақтастықты жақтаймыз», – деді Бақыт Сұлтанов.

Әкімнің дерегінде, қазіргі уақытта ел астанасының 32 мемлекетпен және 29 астанамен туыстық серіктестері бар. Олардың әрқайсысымен екіжақты және көпжақты қатынастар аясында өзара тиімді ынтымақтастықты дамыту көзделген.

«Биыл Нұр-Сұлтан қаласының 2050 жылға дейінгі даму стратегиясын әзірлеп жатырмыз. Ол елордамыздың қарқынды өсуіне, қалалық жерлерді біркелкі дамытуға және бүкіл әлемнің таланттарын тартуға байланысты ұзақ мерзімді міндеттерді есепке алады. Стратегияның мақсаты – бүкіл әлемде бәсекеге қабілетті және тұрақты экономикаға деген тартымдылығы бар жаһандық қала құру. Осылайша елорданы Еуразиялық жаһандық хабқа айналдырамыз», – дейді қала әкімі.

Фархат Әміренов

inbusiness.kz-ті қараңыз, оқыңыз :

Қазақстанның батысындағы хабтың қожайыны ресейліктер болады

Бүгін елордада құны 9 миллиард доллардай тұратын келісімшарттарға қол қойылды.

17 Мамыр 2019 15:20 5544

Қазақстанның батысындағы хабтың қожайыны ресейліктер болады

Астанада осымен үшінші жыл қатарынан жаһандық инвестициялар форумы – «Kazakhstan Global Investment Roundtable» өтті. Бұған дейінгі екеуіне Премьер болып тұрған тұста Бақытжан Сағынтаев басшылық етсе, бұл жолғы инвесторлар форумының хедлайнері Үкімет басшысы Асқар Мамин болып, бар назарын өзіне тартты.

Аспанмен бой таластырған Talan Towers заңғар ғимаратының алдында бүгін кілең қымбат көліктерден тұратын кептеліс пайда болды.Себебі осындағы The Ritz-Carlton Astana қонақүйінде ұйымдастырылған қалталылар басқосуына 41 елден 600-ден астам инвестор жиылыпты. Ірілері қатарында «Cisco», «Nokia», «CITIC Bank Corporation», «WILO SE Group», «AGCO Corporation», «Valmont Industries», «Tyson Foods», «Yildirim Group» және тағы басқа ірі компаниялардың топ-менеджерлерін айтуға болады.

Олар алдында сөз сөйлеген Үкімет басшысы тәуелсіздік жылдары Қазақстан экономикасына 300 млрд доллардан астам инвестициялар құйылғанын хабарлады. Ол өзінің жаңа лауазымға – омбудсмен болып бекітілгенін мәлімдеді. Бұған дейін ол қызметті инвестициялар және даму министрі атқарған.

«Бүгінде еліміз шетелдік инвесторлар үшін ауқымды мүмкіндіктерді ұсынады. Экономикамыз үшін инвестициялардың маңыздылығын түсіне отырып, біз шетелдік инвестицияларды тарту жөніндегі үйлестіру кеңесін құрдық. Инвестициялық омбудсменнің міндеттері қазір тікелей маған жүктеліп отыр. Әрине, бұл сіз бен бізге инвестициялық қызмет барысында туындайтын мәселелерді жылдам шешуге және инвесторлармен тиімді қарым-қатынас орнатуға мүмкіндік береді», – деді Асқар Мамин.

Іс-шара қорытындысында қатысушы инвесторлар отандық және шетелдік журналистер мен фотографтар алдында кезекпен-кезек арнайы үстелге отырып, жалпы құны 8,9 млрд АҚШ долларын құрайтын 45 коммерциялық келісімге қол қойып шықты.

Нақтырақ тоқталсақ, газ-химия саласында Маңғыстау облысының әкімдігі мен сингапурлық «Westgasoil» компаниясы метанол және олефиндерді өндіру бойынша жобаны жүзеге асыру жөнінде ынтымақтастық туралы келісім бекітті. Жобаның жүзеге асырылуы химия өнімдерінің өндірісін Маңғыстау өңірінде шоғырландыруды және тұтастай алғанда, елдің газ-химия кешенін дамыту арқылы импорт алмастыруды қамтамасыз етеді.

Экспортты дамыту мақсатында Жамбыл облысының әкімдігі мен түркиялық «Yıldirim Holding» Жамбыл өңірінде сода өндіру зауытын салу туралы келісімге келді. Зауыттың жылдық қуаттылығы 400 мың тоннаны құрайды.

Бұдан бөлек, ауыл шаруашылығы өнімдерін экспортауға бағытталған жылыжай кешендерін салу жобасы бойынша «Қазақ инвест» ұлттық компаниясы ресейлік инвесторы – «ЭКО-Культурамен» бірге тиісті келісімге қолтаңбаларын қалдырды.

Ал тамақ өнеркәсібінде Павлодар облысының әкімдігі мен қытайлық Beijing NAALE GROUP қант зауытын салу бойынша ынтымақтастыққа келді.

Бұдан өзге, дәл осы инвестор Алматы қаласының әкімдігімен келісімге келіп, Алматы қаласында алюминий өндіретін зауыт салуға ниет білдірді.

Көлік және логистика саласында түркиялық «YDA Holding» Түркістан облысының әкімдігімен бірге, осы өңірде халықаралық әуежай салу туралы келісімге қол қойды. Бұл – Қазақстан тарихындағы жаңадан бой көтеретін алғашқы әуежай болмақ. Астанадағы ЭКСПО үшін ашылған жаңа әуежай ескісінің жалғасы ретінде салынғаны мәлім. Ал «түркі жұртының бесігіндегі» жаңа халықаралық әуежай құрылысы «нөлден» басталады, яғни тақырдан тұрғызылады.

Көлік саласындағы тағы бір жобаны – Ақтөбе халықаралық әуежайы базасында логистикалық хабты құруды Ресей өз қолына алмақ. Бұл ретте, «Қазақ инвест» ұлттық компаниясы мен ресейлік «AEON» корпорациясы өзара меморандум жасасты.

Жатжұрттық бұл инвестор Ресейдің 14 өңірлік әуежайларында, соның ішінде Новосібір, Челябі, Волгоград, Томск, Астрахан, Чита, Түмен, Пермь, Мурманск, Кемерово, Минеральные Воды, Калининград, Улан-Удэ, Владикавказ секілді өңірлеріндегі әуежайлардың қожайыны болып табылады және олардың акцияларының бақылаушы пакетіне ие.

Оның еліміздегі жобасы енді Қазақстанның батысында қосымша авиациялық хабты құруға және «Еуропа-Азия» бағытындағы мультимодальды жүктер тасымалы үшін жаңа бағытты ашуға бағытталған. Жобаның Қазақстанға пайдасы – ол елімізді транзиттік дәліз ретінде нығайтуға мүмкіндік береді. Алайда хабтың қожайыны ресейліктер болмақ.

Тағы бір жаңалық, жақын арада астанада жаңа халықаралық мектептер желісі, колледж және білім беру кешені салынады. Осыған орай білім беру саласында еліміздің үш аймағы Нұр-Сұлтан, Алматы және Шымкент қалаларында сингапурлық инвестор Kinder World «Білім метрополисін салу – мектеп, колледж, университет» жобасының жол картасына қол қойды.

Бақыт Көмекбайұлы

Қазақстан Біріккен Ұлттар Ұйымына есеп беруге дайын

Біздің ел БҰҰ-ның тұрақты даму мақсаттары жөніндегі бағдарламасы аясындағы жұмыстарын биыл таныстырмақ.

17 Мамыр 2019 12:04 1737

Қазақстан Біріккен Ұлттар Ұйымына есеп беруге дайын

ХІІ Астана экономикалық форумына қатысқан премьер-министр Асқар Мамин Қазақстанның БҰҰ-ның тұрақты даму мақсаттарын орындау туралы алғашқы ұлттық есебін биыл таныстыруға дайын екенін мәлімдеді.

Еске сала кетейік, 2019 жылдың шілде айында БҰҰ-ның Нью-Йорктегі штаб-пәтерінде кезекті саяси форум өтпек. Қазақстан алғашқы есебін осы жиында таныстырмақ.

«Бұл біздің алғашқы ерікті есебіміз болмақ. Онда тұрақтылық деңгейін қалай арттыруды жоспарлап отырғанымыз көрсетілген. Алғашқы ұлттық есеп өткен жылдың қараша айынан бастап әзірленді. Бұл  жұмыстармен Қазақстандағы тұрақты даму мақсаттарын орындау жөніндегі үйлестіру кеңесі айналысты», – деді Асқар Мамин.

Премьер-министр Қазақстан Үкіметі БҰҰ-ның өмір сапасын жақсарту, әлемдегі экологиялық және әлеуметтік мәселелерді шешу бағытындағы бастамаларын толықтай қолдайтынын жеткізді.

«Халықаралық ұйымның тұрақты даму мақсаттары жөніндегі бағдарламасы 17 бағыттан тұрады. Оның бірнеше бағыты республиканың даму стратегиясымен үндесіп жатыр. Дәлірек айтсақ, индикаторлардың 50 пайыздан астамы денсаулық сақтау, әлеуметтік, білім беру салаларының даму стратегияларында және мемлекеттік жоспарда көрініс тапқан», – деді Премьер-министр.

Асқар Маминнің сөзінше, соңғы 20 жылда Қазақстандағы жалпы ішкі өнімнің жан басына шаққандағы көрсеткіші 1,1 мың долларға өсіп отыр. Ал мемлекетіміз адами капиталды дамыту көрсеткіші бойынша 189 елдің ішінде 58-орында тұр. Ел тұрғындарының 99,8 пайызы жоғары білім алуға қабілетті. Қазақстан әлемнің жаһандық индексінде 17-орынға тұрақтады. 

Айта кетейік, кеше, яғни 16 мамырда Нұр-Сұлтан қаласында ХІІ Астана экономикалық форумы (АЭФ) жұмысын бастады. Форум алғаш рет 2008 жылы ұйымдастырылған болатын. АЭФ 11 жыл ішінде әлемдік экономика мен қаржы жүйесін жетілдіру, дамыту мәселелерін талқылайтын ең беделді халықаралық платформалардың біріне айналды.

Осы уақыт аралығында форумға әлемнің 150 елінен 50 мыңға жуық делегат, оның ішінде 20-дан аса Нобель сыйлығының лауреаты қатысқан. Шара аясында 20 млрд АҚШ долларынан астам сомаға 300-ден аса меморандум мен келісім жасалған.

Биылғы форумға әлемнің 74 елінен 5 мыңнан астам делегат қатысуда. Олардың қатарында экономика бойынша Нобель сыйлығының лауреаты (2018) Пол Ромер, Халықаралық валюта қорының басқарушы директоры Кристин Лагард, бейбітшілік саласы бойынша Нобель сыйлығының лауреаты (2007) Рае Квон Чунг, Біріккен Ұлттар Ұйымы Бас хатшысының орынбасары, БҰҰ-ның Азия және Тынық мұхитқа арналған экономикалық және әлеуметтік комиссияның атқарушы хатшысы Армида Алишахбана бар.

Фархат Әміренов

inbusiness.kz-ті қараңыз, оқыңыз :

Жаңалықтарға жазылу: