Бүгін қазақстандық футбол жанкүйерлері тарихи сәтке куә болды. Еліміздің төрешілік саласындағы көрнекті тұлғалардың бірі Эльвира Нұрмұстафина бүгін соңғы матчын өткізді.
Эльвираның мансабындағы соңғы ойын Қазақстан Премьер-лигасының 7-турындағы "Жеңіс" пен "Ақтөбе" арасындағы матч болды. Бүгінгі кездесуде ақтөбеліктер 1:0 есебімен Оралхан Өміртаевтың соққан голының арқасында жеңіске жетті.
Эльвира Нұрмұстафина 1985 жылдың 7 тамызында Теміртауда дүниеге келген. Төрешілік жолын 2008 жылы бастап, 2010 жылдан бері FIFA төрешісі атанды. 2013 жылы халықаралық дәрежедегі төреші мәртебесін иеленіп, Қазақстан атынан түрлі халықаралық турнирлерге қатысып жүрді. 2017 жылы ерлер арасындағы кәсіби футболда дебют жасап, 2021 жылдың 3 шілдесінде "Жетісу" мен "Қызыл-Жар СК" арасындағы ойында Қазақстан Премьер-лигасында алғаш рет әйел төреші ретінде тарихта қалды.
Эльвираның халықаралық аренадағы жетістіктері де аз емес. Ол 17 жасқа дейінгі қыздар арасындағы Еуропа чемпионатының (2016, Беларусь) және 19 жасқа дейінгі қыздар арасындағы Еуропа чемпионатының (2019, Шотландия) финалдық кезеңдерінде қызмет атқарды. Сондай-ақ, 2019 және 2023 жылғы әйелдер арасындағы әлем чемпионаттарының іріктеу ойындарында төреші болды. 2022 жылдан бастап Премьер-лига ойындарына VAR төреші ретінде тұрақты түрде шақырылып жүр.
Эльвира Нұрмұстафинаның кәсіби жолы – батылдықтың, жоғары деңгейдегі шеберліктің және футболға деген адалдықтың үлгісі. Ол болашақ төрешілерге, әсіресе қыз-келіншектерге жол ашып, шабыт берген символдық тұлғаға айналды.
