Ойын Мюнхен Аренада өтеді. Матч Қазақстан уақыты бойынша 00:00-де басталады. Кездесуді Qazsport телеарнасы тікелей эфирде көрсетеді. Матчты Славко Винчич бастаған Словениядан келген төрешілер тобы басқарады, деп хабарлайды inbusiness.kz сайты.
Испания құрамасы оңай топқа түскен жоқ. Италия, Хорватия және Албаниямен бір топта өнер көрсету испаниялықтарға плей-офф кезеңіне жолдамаға 100 пайыз кепілдік бермеді. Алайда, Луис де ла Фуэнте шәкірттері алғашқы ойында-ақ көп нәрсені шешіп, Хорватияны 3:0 есебімен жеңді. Екінші кезеңде Италияны 1:0 есебімен аса қиындықпен жеңген испаниялықтар мерзімінен бұрын плей-оффқа жолдама алды. Бірақ, олар Албанияны да минималды есеппен жеңе білді.
Өз тобынан бірінші орынмен шыққан Испанияға топтық кезеңнің басты сенсацияларының бірі Грузияны 1/8 финалдағы қарсылас ретінде алуға мүмкіндік берді. Испания құрамасы бірінші болып гол жіберіп алғанымен, грузиндерге төрт гол соғу аса қиындық тудырмады. Ширек финалда Германиямен өткен ойын қиынға соқты. Негізгі уақыт 1:1 есебімен тең аяқталды, бірақ экстра-таймда Микель Мериноның голының арқасында Испаниялықтар жартылай финалға шықты.
Франция құрамасы бүгінгі қарсыласынан айырмашылығы айқын фаворит саналғанымен, топта 100 пайыздық нәтиже көрсете алмады. Бірінші айналымда Аустрияны 1:0 есебімен ұтқан Дидье Дешам шәкірттері екінші айналымда тәуекелге бармауға бел буып, голсыз тең ойында Нидерландымен ұпай бөлісті. Польшамен болған кездесуде (1:1) француздар бір ұпай алып, топта екінші орынға жайғасты.
1/8 финалда Франция құрамасы Бельгиядан айласын асырып, ширек финалға жолдама алды. Португалиямен текетіресте негізгі уақытта дәл Бельгиямен өткен ойындағыдай жеңіске жету мүмкін болмады. Себебі португалиялықтар қорғаныста сақтық танытты. Бірақ, пенальтилер сериясында нашар өнер көрсетті. Бұл Францияға жартылай финалға шығуға мүмкіндік берді.
Айта кетейік, командалар бұған дейін 36 рет кездескен. 16 кездесуде сәттілік испаниялықтар жағында болса, 13 кездесуде француздар жеңіске жетті. Тағы жеті кездесу тең аяқталды. Командалар Ұлттар лигасының финалында соңғы рет 2021 жылдың қазан айында кездесіп, француздар испаниялықтарды 2:1 есебімен жеңген.
Екінші финалист ертең Нидерланды мен Англия арасындағы кездесуде анықталады. Ал турнирдің финалы 14 шілдеден 15 шілдеге қараған түні Берлинде өтеді.
Естеріңізге сала кетейік, ширек финалда Испания турнир қожайындары Германия құрамасын, француздар Португалияны, Англия Швейцарияны жеңсе, Голландия Түркиядан мықты болып шықты.
