Жас дизайнер Айдана Ерімбетті ел ішінде танитындар көп. Соңғы жылдары оның есімі мен еңбегі шет мемлекеттерге де кеңінен таныла бастады. Әсіресе, дизайнердің Lunagrosh атты арт-жобасы Қазақстанда да, шетелде де үлкен танымалдылыққа ие. Аталған жоба аясында дизайнер этно стильдегі жиһаз бен үйге арналған декорлар жасайды. Коллекциялық жиһазға қызығушылық танытатын еуропалықтар Айдананың қолынан шыққан туындыларды қалт жібермеуге тырысады.
"Тазы қазақ үшін киелі. Оны жеті қазынаға жатқызатыны да сондықтан. Студент күнімде жазушы Мұхтар Мағауиннің "Тазының өлімі" деген хикаятын оқыдым. Ерекше толқыдым. Тазының, яғни Лашынның өлімі жылатты мені. Хикаяттағы Лашынның тектілігі – қазақтың тектілігі, тазының рухтылығы – қазақтың рухтылығы боп көрінді. Тек пен рух бізге қазір ауадай қажет. Тазының өлімі – көп иттің өлімі емес, ол – ұлттық дәстүр мен мәдениеттің, қазақылықтың жойылуына деген қарсылық", – дейді Айдана.
Хикаяттың Айдананы ерекше толқытқаны соншалық, тазының образы ойға ұзақ уақыт бойы түрлі эскиз ретінде ойында жүрді. Талмай ізденеді. Сөйтіп тазы скульптурасы өз формасын тапқан.
"Мен бұл туындыны Мұхтар Мағауиннің шығармасындағы тазының құрметіне "Лашын" деп атадым. Арт-кресло Зерендінің қайыңынан жасалған. Қағазға түскен эксиздерді ағаш шеберлері әдемі қалыпқа түсірді. Lashyn құмай тазы қазақты қорғап, қуанышқа бөлеп, үлкен олжаға кенелдіре берсін деген ниеттен туды", – дейді Айдана Ерімбет.
Өткен жылдың қарашасында дизайнер Дубайда өткен халықаралық көрмеге қатысып, "Lashyn" жобасымен көпшілікті тәнті етті. Тіпті сол жерде тамаша туындыға құда түскендер де табылған. Әрине, көрме кезінде жұртшылық назарына ұсынылған дүниені сатуға болмайды.
Бүгінде Айдананың Lashyn-ы қазіргі заман талабына сай келетін үй жиһазының біріне айналды. Мұндай тамаша дүние әр қазақтың төрінде тұруға тиіс.
– Ендігі арманым – дизайнерлік қабілетін жаңа қырынан танытуға ерекше шабыт сыйлаған "Тазының өлімі" хикаясының авторы, жазушы Мұхтар Мағауинмен кездесу, – дейді көркем шығарманың киноға ғана емес, көздің жауын алар көрікті жиһазға да айналатынын дәлелдеген дизайнер.
Айтпақшы, Айдана Дубайда өтіп жатқан халықаралық ЭКСПО-2020 көрмесіндегі Қазақстанның ұлттық павильонындағы мейрамхананы безендірген. Ұлттық нақыштағы мейрамхана жаһан жұртына қазақтығымызды, ғажаптығымызды танытып тұр.
Айдана – оңтүстік өңірінің тумасы. Кейін отбасымен бірге Көкшетауға қоныс аударған. Осы қаладағы сурет мектебінде оқыпты. Елордадағы политехникалық колледжді "интерьер дизайнері" мамандығы бойынша тәмамдаған. Жоғары білімді Алматыда алған. Бүгінде елордада өзінің жеке дизайн студиясы бар. Этно жобаларды жүзеге асыруға жақсы машықтанған. Командасымен бірге тұрғын үйлерді, қонақүйлерді, мейрамханаларды безендірумен айналысады.
Ғалия ӘДІЛ
