DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 311,62 Brent 36,55
Головкин өз кешіне Елеусіновті қоспай қойған ба?

Головкин өз кешіне Елеусіновті қоспай қойған ба?

GGG 8 маусым күні Нью-Йоркте өтетін бокс кешіне Данияр Елеусіновтің емес, Исраил Мадримовтың өнер көрсетуіне келісім берген.  

16 Мамыр 2019 16:45 1691

Головкин өз кешіне Елеусіновті қоспай қойған ба?

Автор:

Маруан Түсіп

Фото: fightsports.tv

Бұл арандатушылық па, әлде шынымен де осылай болған ба, белгісіз. Бірақ бүгін отандық басылымдарда осындай ақпарат таратылып жатыр. Бұл ретте, тіпті Данияр Елеусіновтің менеджерлерінің басшысы Зия Алиевтің сөздері де көлденең тартылып отыр. Оған сенсек, Елеусіновке Геннадий Головкиннің жекпе-жегінің андеркартында өнер көрсетуге келісім берілмеген.

«Біздің промоутеріміз Елеусіновке қатысты шығынның бәрін төлеуге дайын еді. Бұл жөніндегі ресми хат менде бар. Оған Том Леффлер (Геннадийдің промоутері) келіскендей болатын. Бірақ Головкин келісім бермепті. Даниярдың емес,өзбек Исраил Мадримовтың жұдырықтасқанын қалаған», – депті. Оның бұл сөздерін отандық sports.kz сайты жариялады.

Өтірік пе, шын ба, белгісіз. Енді Головкиннің өзі немесе оның командасындағы өкілдерінің бірі осы мәселеге қатысты мәлімдеме жасап, тоқетерін айтар деп отырмыз. Әйтпесе, қандай да бір себебі болған да шығар. Бәрі де анықталар, белгілі болар. Әліптің артын бағайық...

Естеріңізге сала кетейік, Геннадий Головкин (38-1-1, 34 KO) 8 маусым күні Нью-Йорктегі Madison Square Garden аренасында Канада боксшысы Стив Роллспен (19-0, 10 KO) жұдырық түйістіреді. Бұл жекпе-жек 164 фунт салмақ дәрежесінде өтеді. Әрі DAZN компаниясымен келісілген алты жекпе-жегінің біріншісі болады.

Айтпақшы, Исраил Мадримов (2-0, 2 KO) жақында ғана Бангкокта өткен Азия чемпионатының ширек финалында біздің Тұрсынбай Құлахметтен ұтылып қалған. Өзбек боксшысының Головкин – Роллс жекпе-жегінің андеркартында айқасатынын ESPN журналисі Стив Ким де жариялады.

Маруан Түсіп

inbusiness.kz-ті қараңыз, оқыңыз :

Канелло кезекке тұрсын

Орта салмақтағы Әлем чемпионы Геннадий Головкиннің бапкері Джонатан Бэнкс ақпарат көздерін дүр сілкіндірді.

21 Сәуір 2020 00:28 1018

Канелло кезекке тұрсын

Бапкердің айтуы бойынша қазақстандық боксшының Сауль Канело Альвареспен жұдырықтасу жоспарында жоқ екен. Бүкіл бокс әлемі GGG-Канело трилогиясын күтті. Ал көптеген сарапшылар кездесу коронавирус пандемиясына байланысты өтпейді деген пікірде еді. Осы трилогия үшін сарапшылар Альварестің британдық Билли Джо Сондерспен жекпе-жегін кейінге қалдырғаны жөн деп санады. Алайда, Сондерстің өзі уақыттың өтіп бара жатқанына байланысты атағын қорғауы тиіс болатын. Сосын британиялық былғары қолғап шебері отандасымызды жекпе-жекке шақырды. Ал Головкин болса IBF белбеуін құрбан етіп, мексикалықпен кездескісі келді. Оған түрлі себептер де бар. Өйткені Генаның ежелгі жауы Сауль Альварес DAZN платформасымен келісімге отырды. Сондықтан да, трилогия түбі болатынға ұқсап кетті. Тіпті, үшінші жұдырықтасудың өтетін күні де белгіленіп, тілшілер 12 қыркүйек күні нағыз шоу болады деп жарияға жар салып жіберді.

«Канеллоның командасы бізге қоңырау шалды. Олар біздің боксшымен жұдырықтасуға дайын екендіктерін айтты. Алайда, біздің де алға қойған жоспарларымыз бар. Алдымен Камил Шереметамен кездесуіміз қажет. Сосын барып Канеллоны да көре жатармыз. Сондықтан да, бұл үшінші кездесуді асықпай ойланып, екіжақты келісіммен өткізгеніміз дұрыс», – деді Бэнкс.

Америкалық телеарнаға берген бұл сұқбатында бапкер өзінің жауапкершілігінің көп екенін аңғартқандай. Әдетте, бапкерлер кездесудің өту-өтпеуін, қай күні болатынын, тіпті қарсылас командаға жауап қайтарып жүрмейді. Бапкер – боксшының кездесуге дайындығын пысықтайтын маман. Ал Бэнкс мырза промоутердің рөлін атқарып отырғандай сезілді. Осыдан соң көптеген мамандар Головкинге бапкер ауыстыру қажет екенін айтты. Ондай пікірлердің дені мынандай: Бэнкс ісінен сөзі көп адам. Ол Альвареске қарсы кездесуге дайындықты дұрыс жүргізе алмайды. Головкин бұрынғы бапкері Абель Санчесті қайта шақыруы тиіс.

Геннадий Головкин 2017 жылы Сауль Альвареспен кездесу үшін өзінің белбеуін қорғамай-ақ бере салған болатын. Тамыз айында өтуі тиіс кездесу Саульдің допингтен өте алмай қалуына байланысты кейінге шегерілді. Сосын, келесі жылы тамызда Геннадий Сергей Деревянченкомен кездесіп, жеңіске жетті. Сондықтан да, Камил Шереметамен кездесу кейінге шегерілуі әбден ықтимал. Егер қазақстандық боксшы бұл тартыстан бас тартса, онда оның белбеуі қайтадан сарапқа салынады. Ал осыған дейін белгілі болғандай Шереметамен болатын кездесу шілде айына жоспарланған болса, онда күзде өтуі тиіс трилогияға Головкин дайындалып үлгермейді. Сондықтан да, қазір соңғы сөз промоутерлерде болып отыр.

Ермұхамед Мәулен

Головкин Стив Роллсты сұлатып салды

Қазақстан боксшысы кәсіпқой бокс рингіндегі 39-ыншы жеңісіне қол жеткізді.

09 Маусым 2019 10:39 1449

Головкин Стив Роллсты сұлатып салды

Фото: twitter.com/TheGarden

Бүгін таңертең Нью-Йорктегі Madison Square Garden аренасында бокс кеші өтіп, ондағы негізгі жекпе-жекте Геннадий Головкин мен Стив Роллс жұдырықтасты. Бұл жекпе-жек ұзаққа созылмай, төртінші раундта аяқталып, GGG кәсіпқой бокстағы 39-ыншы жеңісіне қол жеткізді.

Головкиннің көп ішінен таңдап алған қарсыласының да әуселесін көрдік. Өзі айтқандай, көпшілікті сүйсіндіре алмады. Бірінші раундта жасқаншақтап жүргендей де болды. Соққылары әлсіздеу. Ал Геннадий қарқынын бірте-бірте үдетіп отырды. Алғашқы екі раундты бойқыздыру ретінде өткізгендей болды.

Геннадий төртінші раундта қарсыласын бастырмалата соққының астына алып еді, Стив Роллс арқанға тіреліп, қорғанысты мүлдем ұмытты. Әр төтеп бере алмай қалды. Ал жағынан тиген ауыр соққыдан соң етпетінен құлады. Нокаут. Бұл жекпе-жек осылай, Канада боксшысының (19-1, 10 KO) жеңілісімен аяқталды.

Геннадий Головкин (39-1-1, 35 KO) осы жеңісінен соң Сауль Альвареспен (Канеломен) үшінші рет айқасқысы келетінін мәлімдеді. Ал Канелоның промутері Оскар Де Ла Хойя өзінің твиттердегі жеке парақшасына «Әдемі жеңіспен оралдың. Енді нағыз қарымды боксшымен шық, Белбеу ұтып ал, сонда мен үшінші жекпе-жекті ұйымдастыруды ойластырамын», – деп жазды. 

Бұл кеште біздің елден тағы да екі боксшы шыққан. Али Ахмедов (15-0, 11 KO) Америка боксшысы Маркус МакДэниэлмен (15-1, 2 KO) жұдырық түйістіріп, үшінші раундта техникалық нокаутпен үстем түсті. Қарсыласынан деңгейі жоғары екенін паш етті. Әрі екінші орта салмақтағы WBC International белбеуін жеңіп алды.

Ал жартылай орта салмақтағы Бахтияр Эюбов (14-1-1, 12 KO) Америка боксшысы Брайан Себальодан (9-0, 4 KO) ұтылып қалды. Сегіз раундқа созылған жекпе-жек төрешілердің бірауызды шешімімен аяқталды – 73:79, 74:78 және 72:80. Қазақстан боксшысы кәсіпқой бокс рингінде бірінші рет жеңілістің кермек дәмін татты.

Маруан Түсіп

inbusiness.kz-ті қараңыз, оқыңыз :

Жаңалықтарға жазылу: