Қазақстандық бапкер Григорий Бабаян мәскеулік ЦСКА клубының делегациясымен бірге Бад Тацмансдорфтағы (Австрия) оқу-жаттығу жиынына барды. Бірақ қызметінен кеткен Ивица Оличтің орнына оның бас бапкер болып тағайындалатыны туралы ақпарат жоқ, - деп хабарлайды Sport-Express.
15-маусымда ЦСКА клубы бас бапкер Ивица Оличтің кететіні туралы хабарлады. Хорватиялық маманның басшылығымен ЦСКА тоғыз кездесу өткізіп, оның төртеуінде жеңіске жетіп, бір рет тең түсіп, төрт рет жеңіліске ұшыраған. Қазір мәскеулік команданы жаңа маусымға Алексей Березуцкий дайындауда. Ал Бабаян команда ойыншыларына оның көмекшісі ретінде таныстырылды.
Еске салайық, бұған дейін Бабаян болгариялық маман Станимир Стойловтың командасы "Нижний Новгородқа" баруы мүмкін деген ақпарат болған еді. Бабаян кеткеннен кейін қостанайлық клуб оның көмекшісі Александр Москаленкоға сенім артып көрмек. Ол "Тобылды" Қазақстан чемпионатының 16-турының "Жетісуға" қарсы матчына дайындап қана қоймай, маусымның соңына дейін елдің вице-чемпиондарын баптайтын болды.
Сондай-ақ Бабаянның қызметінен кетуі "Тобылдағы" қаржылық жағдаймен байланысты емес. Бабаян 2019-жылдың желтоқсанынан бастап "Тобылды" жаттықтырды. Командамен бірге ол 2020-жылы Қазақстан премьер-лигасының күміс жүлдесін және 2021-жылы Қазақстан Суперкубогын жеңіп алды. Осы маусымда қостанайлық клуб турнирлік кестеде көш бастаған "Астанадан" үш ұпай артта қалып, чемпионатта екінші орынға шықты.
Тағы бір жақсы жаңалық - жарақат алған отандасымыз Бахтиер Зайнутдинов кеше алғаш рет командамен бірге жаттығу жасады. Ол жарақатына байланысты алаңға шықпай, маусымның біраз бөлігін жіберіп алды. Себебі мамыр айында оған ота жасалды. Өткен маусымда Ресей премьер-лигасында Бахтиер 22 матч өткізіп, бір гол соғып, екі нәтижелі пас берген.
Ермұхамед Мәулен
