"Манчестер Ситидің" бас бапкері Пеп Гвардиола бапкерлік мансабындағы 1000-матчтық межесін жарқын жеңіспен атап өтті.
9 қараша, жексенбі күні Манчестердегі "Этихад" стадионында Англия Премьер-лигасының 11-туры аясында матч өтті.
Онда "Манчестер Сити" мен "Ливерпуль" кездесіп, ойын 3:0 есебімен алаң иелерінің жеңісімен аяқталды.
"Қалалықтар" 13-минутта есеп ашатын мүмкіндік алған. Алайда шабуылшы Эрлинг Холанд пенальтиді голға айналдыра алмады. Дегенмен, 29-минутта норвегиялық шабуылшы мергендік танытты. Тайм соңында Нико Гонсалес есепті еселей түсті. Ал 63-минутта Жереми Доку гол соқты.
Осылайша, Гвардиола шәкірттері "Этихадта" "Ливерпульді" толықтай басымдықпен ұтып, командасы Премьер-лигада "Арсеналдың" ізіне түсіп, 2-орынға көтерілді. Арадағы алшақтық 4 ұпай ғана.
