Делавэр штатының Канцлерлік соты 2024 жылғы қаңтарда қазіргі құны 139 млрд доллар болатын опциондарды беру үдерісі акционерлер үшін әділетсіз болды деп шешім шығарған еді.
Бұған Делавэр штатының Жоғарғы сотының Tesla компаниясының акция опциондарын Маскке беру туралы шешімді жарамсыз деп таныған төменгі соттың үкімін жоюы себеп болды. Forbes мәліметінше, апелляция сәтті аяқталғаннан кейін Масктың жалпы байлығы рекордтық 749 млрд долларға жеткен.
Forbes 2024 жылдың қаңтарынан бері аталған Tesla акция опциондарының құнын 50%-ға төмендетіп есептеп келген. Себебі сол кезде Делавэр штатының Канцлерлік соты 2018 жылы Маскке опцион беру үдерісі оның Tesla директорлар кеңесіне ықпалына байланысты әділетсіз өтті деп шешкен еді. Алайда жұма күні Жоғарғы сот "опциондарды қайтарып алу – орынсыз шара" деп таныған соң, Forbes бұл жеңілдікті алып тастап, Масктың байлығын 69,5 млрд долларға арттырды.
Сот шешімінен кейін Tesla қайтадан Масктың ең қымбат активіне айналды. Акция опциондарынан бөлек, ол электромобиль өндіруші компанияның 12% акциясына ие, олардың құны 199 млрд долларды құрайды. Осылайша, Масктың Tesla-дағы жалпы үлесінің құны 338 млрд долларға жетті. Бұған қоса, қараша айында Tesla Маскке рекордтық жалақы пакетін бекітті. Егер компания алдағы он жылда нарықтық капитализациясын сегіз еседен астам арттыру секілді "Марс миссиясы" деп аталатын көрсеткіштерге қол жеткізсе, Маск қосымша 1 трлн долларға дейінгі акция алуы мүмкін (салықтар мен шектеулі акцияларды ашу шығындарын есептемегенде).
Масктың екінші ең қымбат активі – SpaceX компаниясындағы шамамен 42% үлесі болады. Осы айда өткен жеке тендерлік ұсынысқа сәйкес, зымыран өндіруші компания 800 млрд долларға бағаланды (тамыз айындағы 400 млрд доллардан өскен). Соның нәтижесінде Масктың SpaceX-тегі үлесінің құны шамамен 336 млрд долларды құрап, Tesla-дегі үлесінен небәрі 2 млрд долларға кем болып отыр. Дегенмен Маскты әлемдегі алғашқы триллионер етуі мүмкін компания – дәл осы SpaceX болуы ықтимал. Компания 2026 жылы IPO өткізуді жоспарлап отыр, оның бағалануы шамамен 1,5 трлн долларға жетуі мүмкін.
Google компаниясының негізін қалаушылардың бірі әрі әлемдегі екінші ең бай адам саналатын Ларри Пейдждің байлығы 253 млрд долларға бағаланады – бұл Масктың байлығынан шамамен жарты триллион долларға аз.
