Алдағы жұмада, яғни 5 шілдеде Алматыдағы Балуан Шолақ атындағы спорт және мәдениет сарайында көпшілік елеңдеп отырған кәсіпқой бокс кеші өтеді. Бұл кештегі негізгі жекпе-жекте әлі ешкімнен жеңіліп көрмеген Қанат Ислам (25-0) WBO Inter-Continental белбеуі үшін доминикандық Хулио де Хесуспен (27-1) жұдырық түйістіреді.
Сондай-ақ, Мадияр Әшкеев NBA белбеуі үшін эстон Павел Семеновпен айқасады. Ал жеңіл салмақтағы Абылайхан Құсайынов армян Гарник Арутюнянмен NBA белбеуін сарапқа салады. Жалпы, бұл кеште 10 жекпе-жек өтіп, Қазақ елінің қайсар қырандары алыс және жақын шет елдерден келген боксшылармен кездеседі.
Осыған орай, 4 шілде күні Алматы қаласының Сейфуллин көшесі бойындағы "Мега Парк" сауда және ойын-сауық орталығында салмақ өлшеу рәсімі мен баспасөз жиыны өтеді. Оған осы бокс кешінде шаршы алаңға шығатын боксшылардың бәрі де қатысады. Енді олардың бәрімен таныс болыңыздар.
Маруан Түсіп
