Қарағандылық белсенді, журналист Айсұлтан Жақып бастаған топ Нұр-Сұлтанда митингіге шығып, ұсталғандарға көмек қолын созуға кірісті. Бейресми деректер негізінше елдің бас қаласында ұсталған бірнеше адамды Шахтинск, Теміртау, Осакаров өңірлеріндегі полиция бөлімдеріне жеткізілген. Сайлаудан кейін Республика қозғалысын құрған Айсұлтан Жақып бастаған бірнеше азамат 13 маусымда Теміртауда қамалғандарға барған. Айсұлтан Мұхамедияұлының айтуынша, олар алдымен Қарағанды өңіріне қамалғандар туралы ақпарат жинап, туыстарымен хабарласып әлі қамаудан шықпағанын анықтап алған соң іске кіріскен. Республика қозғалысының мүшелері бірігіп, қаражат жинап, соған тамақтармен қоса су, темекі, гигигеналық заттарға дейін сатып алған. Нақтыланбаған дерек бойынша Теміртауда елу шақты ұсталғандар бар екен. Көмекке барған белсенділерге кезекші бөліміндегілер нақты қанша адамның бар екенін айтпаған, тек үш мезгіл ыстық тамақ берілетінін мәлімдепті.
"Кезекші бөліміндегілерге егер бұл жерде он шақты адам ғана жатса,әкелген тамағымыздың жартысын ғана тастап кетеміз ба деп сөз суыртпақтап көрдік. Мұнда тұрған қазақтың жігіттері ғой "енді барлығын қалдырып кетсеңіздер де болар мүмкін" деп айтып қалды. Апарған қасық кеселеріміз қажет болмай қалды, ыдыс жеткілікті деді, сонымен апарған тамақтарымызбен ұсақ-түйек заттарымыздың барлығын Теміртауда отырған жігіттерге қалдырып кеттік", – дейді Республика қозғалысының мүшесі Айсұлтан Жақып.
Республика қозғалысының жігіттері енді бүгін Шахтинск қаласымен Осакаров ауданында отырған азаматтарға азық түлікпен керек жарақтарын жеткізетінін мәлімдеді. Бейресми мәліметтер бойынша 13 маусымда Шахтинск қаласында қамауда отырған 7 тұрғынды босатып, арнайы автобуспен Нұр-Сұлтан қаласына жіберген. Мұнда митингіде ұсталып қамауда отырғандар әлі бар.
Еске сала кетсек 11 маусымда ІІМ Нұр-Сұлтан қаласында сайлау күні наразылыққа шыққан 200 адамды Ақмола және Қарағанды облысының өңірлеріне апарғанын мәлімдеген болатын.
Арайлым Еркебаева
