Нұр-Сұлтан қаласында "1000 орын - көше саудасы" бағдарламасы жүзеге асырыла береді. Бұл туралы "Атамекен" ұлттық кәсіпкерлер палатасының VI конференциясында Нұр-Сұлтан қалалық кәсіпкерлер палатасының директоры Алмат Жүнісов айтты.
Оның сөзінше, елордада 129 мың субъекті шағын және орта бизнес өкілі ретінде тіркелген. Олар жалпы өңірлік өнімнің 58%-ын қалыптастырып отыр.
Биылғы жылдың 7 айында шағын және орта бизнес субъектілері қала бюджетіне салық түрінде 336 млрд теңге аударған.
"Билік бизнеске жан-жақты қолдау көрсетіп жатыр. Палата "1000 орын - көше саудасы" бағдарламасы аясында биыл 20 сауда орнының үлестірілуіне атсалысады",- деді Алмат Жүнісов.
Айта кетейік, бүгінгі таңда елордада "1000 орын - көше саудасы" бағдарламасы нақты нәтиже беріп жатыр. Бағдарлама аясында Astana әлеуметтік-кәсіпкерлік корпорациясы АҚ 603 жер телімін игеріп отыр. Бүгінге дейін 409 павильон орнатылған. Кәсіпкерлер кедергісіз жұмыс істеп, табыс табуда.
Қанат Махамбет
